Kryebashkiaku i Tiranës, Erion Veliaj, ka bërë publike përgjigjet e tij ndaj Toni Gogut, lidhur me transferimin në burg, protestat dhe drejtimin e Bashkisë së Tiranës. Në shënimet e publikuara, Veliaj drejton akuza ndaj kryeministrit Edi Rama, mohon përfshirjen në organizimin dhe financimin e protestave dhe shprehet se nuk do të delegojë më drejtimin e bashkisë.
Në përgjigjen e parë, Veliaj ndalet te transferimi i tij, të cilin e konsideron një përpjekje për ta izoluar nga familja dhe për ta intimiduar. Ai shprehet se nuk do të përkulet, pavarësisht vendit ku mund të dërgohet.
“Çfarë ‘nderi’ duhet t’i njoh KM? Që negocion me prokurorët për sa akuza do kem e sa vite do marr?”, shkruan Veliaj, duke iu referuar kryeministrit Rama.
Ai mohon gjithashtu pretendimet se është organizator apo financues i protestave të zhvilluara në Tiranë.
“Nuk jam organizator e financues as i Flamingove, as studentëve – këto janë gjepura si në kohë të Enverit! Ku është katandis shteti, gjeti armikun e brendshëm”, shprehet ai.
Veliaj kundërshton edhe akuzat për synimin e rrëzimit të rendit kushtetues nga burgu, duke ironizuar pretendimet për përfshirje në akte terrorizmi. Sa i përket protestave dhe dëmtimeve në kryeqytet, ai thotë se nuk do të dëmtonte qytetin që ka drejtuar.
“Unë nuk i bie shtëpisë sime me gurë. PS jo e jo, po flas Tiranën. Jam marrë me çdo semafor, pllakë në shesh, sinjalistikë etj. Më dhemb më shumë se të gjithë ju bashkia”, shkruan Veliaj.
Në pjesën e dytë të përgjigjeve për Gogun, kryebashkiaku ndalet te drejtimi i Bashkisë së Tiranës dhe refuzimi për t’ia deleguar më këtë përgjegjësi dikujt tjetër. Ai pretendon se gjatë 18 muajve që drejtimi ishte deleguar, nuk janë realizuar investime të rëndësishme. Ndërsa pas rikthimit të tij, sipas Veliajt, janë zhbllokuar gjashtë shkolla dhe janë dhënë mbi 1,500 kredi të buta.
“Jo se jam më i afti, po se jam zgjedhur, ndaj dhe më i përgjegjshëm”, argumenton ai.
Veliaj kritikon gjithashtu mënyrën e promovimit të emrave në Bashki dhe në Partinë Socialiste, duke vlerësuar disa prej personave të përmendur për drejtimin e institucionit. Për Arbrin, ai shprehet se nuk ka kundërshtime personale, por thekson se nuk do ta delegojë më drejtimin.
“Ndaj hajt ta promovojmë Arbrin, s’është djalë i keq, por delegimin nuk e bëj më”, shkruan Veliaj.
Në pjesën e tretë, Veliaj flet per Plarent Ndrecën, duke shpjeguar marrëdhënien e tij me të dhe takimin e fundit në burg. Ai pretendon se për 20 muaj nuk ka pasur mundësi të këshillohet me persona të tjerë dhe se Ndreca ka qenë ndër të paktët që i kanë qëndruar pranë.
“Plaro m’u bë shok, mik e avokat. Para vakisë ishim bashkëpunëtorë, po ngaqë ju ikët a s’ju la udhëheqësi, mbeta veç me Plaron e tani them më mirë 1 i saktë se 1000 servilë kot”, shkruan Veliaj.
Ai tregon se takimi përfundoi në mesnatë, pasi Ndreca i solli dy libra dhe më pas u largua, ndërsa vetë Veliaj u kthye në qeli me paterica. Në fund, ai shprehet se i ka uruar të mira, por nuk pranon përfshirjen në afera të paligjshme.
