Rreth 25 mijë shtetas polakë janë larguar nga Mbretëria e Bashkuar gjatë periudhës 2024–2025, ndërsa vetëm 7 mijë kanë hyrë në vend, duke çuar në një migracion neto negativ prej afro 18 mijë personash.
Të dhënat, të publikuara nga Zyra Kombëtare e Statistikave në Britani dhe të llogaritura në fund të muajit qershor, tregojnë një trend në rritje të largimit të polakëve nga Mbretëria e Bashkuar.
Edhe në periudhat 2022–2023 dhe 2023–2024 migracioni neto ka qenë negativ, respektivisht me 13 mijë dhe 18 mijë persona.
Sipas mediave britanike, një nga arsyet kryesore lidhet me zhvillimin e shpejtë ekonomik të Polonisë, veçanërisht në sektorin teknologjik, si dhe me koston më të ulët të jetesës krahasuar me Mbretërinë e Bashkuar.
Nga ana tjetër, vetë qytetarët polakë theksojnë se rritja e standardit të jetesës në vendin e tyre, së bashku me koston në rritje të jetesës dhe nivelin më të lartë të kriminalitetit në Britani, janë faktorë që po i shtyjnë të rikthehen.
Në raport përmendet gjithashtu se në të kaluarën janë regjistruar edhe komente raciste ndaj polakëve nga figura publike në Mbretërinë e Bashkuar, megjithëse marrëdhëniet mes dy vendeve mbeten të forta.
Që nga tranzicioni politik i vitit 1989, Polonia është shndërruar në një nga ekonomitë me rritjen më të shpejtë në Europë.
Paralelisht me këtë trend, një numër në rritje i shtetasve britanikë po zgjedhin të zhvendosen drejt Polonisë.
Megjithatë, pavarësisht kësaj vale rikthimi, shtetasit polakë vijojnë të përbëjnë një nga komunitetet më të mëdha të të huajve në Mbretërinë e Bashkuar./skyweb.al
