Fincantieri Albania do të jetë shoqëria pjesërisht shtetërore, e cila do të prodhojë anijet ushtarake në bazën detare të Pashalimanit.
Kompania është regjistruar në Qendrën Kombëtare të Biznesit si një partneritet publiko privat, ku shteti shqiptar zotëron 49 për qind të aksioneve përmes shoqërisë ushtarake Kayo, ndërsa gjigandi italian Fincantieri mban 51 për qindëshin tjetër.
Sipas dokumentave të depozituara në QKB, objekti i shoqërisë do të jetë ndërtimi i anijeve detare deri në 80 metra gjatësi, 800 ton zhvendosje dhe një thellësi maksimale midis 2 dhe 3 metrave.
Në prill të këtij viti, qeveria shqiptare firmosi me kompaninë italiane Fincantieri marrëveshjen për prodhimin e përbashkët të anijeve ushtarake. Sipas marrëveshjes, prodhimi i anijeve pritet të nisë në vitin 2027, ndërsa të gjithë studentët që do të përzgjidhen nga shkolla Pavarësia do të trajnohen në Itali nga kompania Fincantieri.
“Janë 500 vende pune të mirë paguara, janë 500 vende pune në këtë sistem të ri që po ndërtohet. Dhe duhet pas parasysh që të gjithë ata të cilët do të përfshihen në këtë sipërmarrje nuk do të jenë thjesht njerëz që zotërojnë një zanat, por do të jenë dhe njerëz që do të do të shikohen edhe nga ana e figurës së tyre, sepse do të jenë pjesë e sistemit të mbrojtjes së Republikës së Shqipërisë”, tha kryeministri Edi Rama, gjatë firmosjes së marrëveshjes.
Ndërsa kreu i Fincantierit shpalosi objektivat e prodhimit në Shqipëri.
Mendojmë të ndërtojnë 10 mjete lundruese/anije deri në 2030, me gjatësi deri në 80 metra”, tha Pierroberto Folgiero, CEO i Fincantieri. /kapitali.al
