Administratori i Shoqërisë “Vlora International Airport, VIA Sh.p.k.”, Valon Lluka, ka reaguar pas shkarkimit nga detyra, duke theksuar se deri tani nuk ka marrë asnjë njoftim zyrtar.
Në një deklaratë publike ai tha se lajmin e ka mësuar vetëm nga mediat dhe se mbetet i pa informuar për arsyet ligjore të një vendimi të tillë.
“Që në fillim dëshiroj të theksoj se nuk jam njoftuar zyrtarisht për një vendim të tillë dhe nuk kam marrë asnjë akt apo komunikim formal nga organet kompetente të shoqërisë. Deri më tani, informacioni që disponoj buron vetëm nga raportimet mediatike. Si rrjedhojë, mbetem plotësisht i pa informuar mbi shkaqet dhe arsyet ligjore që mund të kenë motivuar një veprim të tillë,”, shkruan Lluka.
Ai vuri në dukje se gjatë katër viteve në drejtimin e projektit të Aeroportit të Vlorës ka respektuar kuadrin ligjor dhe kontratën koncesionare, duke i bazuar vendimet mbi transparencën dhe përgjegjësinë.
“Në ushtrimin e detyrës sime si Administrator, kam vepruar gjithmonë në përputhje të plotë me Statutin e Shoqërisë, me Kontratën e Koncesionit, si dhe me të gjithë kuadrin tjetër ligjor e rregullator të zbatueshëm. Çdo vendim apo akt nga ana ime ka qenë i mbështetur mbi parimet e ligjshmërisë, transparencës dhe përgjegjësisë, me qëllim zhvillimin dhe përfundimin me sukses të këtij projekti strategjik dhe të rëndësishëm për shtetin shqiptar.”
Lluka akuzoi biznesmenin Behgjet Pacolli për “devijim të rëndë nga parimet e qeverisjes së mirë korporative”, duke theksuar se motivet e shkarkimit nuk lidhen me performancën apo përkushtimin e tij. Ai paralajmëroi se do të ndjekë rrugën ligjore për të mbrojtur reputacionin dhe të drejtat e tij.
“Arsyet dhe motivet e një vendimi të tillë duhet dhe do të kërkohen nga aksionari që e ka ndërmarrë këtë vendim, e i cili përbën një devijim të rëndë nga parimet e qeverisjes së mirë korporative, normat etike dhe standardet profesionale që duhen respektuar në administrimin e një projekti të kësaj natyre.”
Në fund të reagimit, ai u shpreh se projekti i Aeroportit të Vlorës ka qenë një angazhim i veçantë për të, duke falënderuar stafin dhe institucionet që kanë mbështetur përfundimin e tij.
“Për gati katër vite kam punuar me përkushtim maksimal për të çuar përpara këtë projekt madhor, i cili tashmë ndodhet në fazën përfundimtare të punimeve dhe në prag të nisjes së operimeve. Shpreh mirënjohjen time të sinqertë për stafin e jashtëzakonshëm të VIA-s për profesionalizmin dhe përkushtimin e treguar, për institucionet publike shqiptare për mbështetjen dhe bashkëpunimin, për institucionet financiare që kanë besuar në këtë projekt dhe për nënkontraktorët e partnerët tanë, të cilët kanë kontribuar me profesionalizëm në realizimin e tij.”
Lajmi për shkarkimin e Llukës si edhe problemeve mes aksionerëve të Aeroportit të Vlorës u raportua fillimisht nga Kapitali.
/skyweb.al
