Tregu i automjeteve në Shqipëri po shfaq një orientim të qartë drejt teknologjive me emetime më të ulëta, ndërsa të dhënat zyrtare tregojnë një dominim të makinave Plug-in Hybrid në regjistrimet e reja.
Sipas statistikave të publikuara nga Drejtoria e Përgjithshme e Shërbimeve të Transportit Rrugor, gjatë muajit janar 2026, 88% e autoveturave me 0 kilometra të regjistruara në vend i përkasin kategorisë Electric Hybrid Plug-in.
Krahasuar me janarin e vitit 2025, kjo përfaqëson një rritje prej 10.2%, duke konfirmuar një trend të konsoliduar të konsumatorëve drejt mjeteve me teknologji më efikase dhe me ndikim më të ulët mjedisor. Të dhënat sinjalizojnë një ndërgjegjësim në rritje për reduktimin e emetimeve dhe për kursimin e kostove afatgjata të përdorimit.
Automjetet Plug-in Hybrid kombinojnë një motor elektrik me një motor me djegie të brendshme dhe ofrojnë mundësinë e karikimit nga rrjeti elektrik. Krahasuar me hibridet tradicionale, ato sigurojnë autonomi më të madhe në modalitetin elektrik dhe fleksibilitet në përdorim, duke ulur ndjeshëm konsumin e karburantit, veçanërisht në lëvizjen urbane.
Rritja e peshës së kësaj kategorie në regjistrimet e reja konsiderohet një hap i rëndësishëm drejt krijimit të një flote më të pastër dhe më efikase, duke e afruar Shqipërinë me standardet europiane për mobilitet të qëndrueshëm. Nëse trendi vijon me këto ritme, struktura e tregut të makinave të reja pritet të ndryshojë ndjeshëm edhe gjatë muajve në vijim. /skyweb.al
