Gjatë ngritjes së një avioni ka një pikë shumë të rëndësishme që quhet V1. Kjo është shpejtësia e vendimit, momenti kur pilotët duhet të kenë marrë vendimin përfundimtar: të ndalojnë ose të vazhdojnë ngritjen.
Edhe pse nuk vihet re nga pasagjerët, kjo ka shumë rendësi për pilotët, sepse pas kësaj shpejtësia ata nuk kanë zgjidhje tjetër përveç se duhet të ngrenë avionin në ajër.
Logjika është e thjeshtë:
- Para V1 → nëse ndodh një problem, avioni mund të ndalet në pistë në mënyrë të sigurt.
- Pas V1 → nuk ka më hapësirë të mjaftueshme për ndalim, ndaj ngritja duhet të vazhdojë, edhe nëse ka një problem, qoftë edhe në njërin prej motorëve.
Kjo do të thotë që V1 është praktikisht pika pa kthim gjatë ngritjes.
Në kabinë, pilotët e konfirmojnë këtë moment me thirrjen “V1”. Disa sekonda më vonë dëgjohet “Rotate”, kur avioni ngrihet nga pista.
V1 nuk është e njëjtë për çdo fluturim. Ajo llogaritet çdo herë, bazuar në:
- peshën e avionit
- gjatësinë e pistës
- temperaturën dhe erën
- gjendjen e pistës
Për pasagjerët, gjithçka duket si një përshpejtim normal. Por në realitet, në ato sekonda pilotët kalojnë nga një fazë ku mund të ndalojnë, në një fazë ku duhet të fluturojnë me çdo kusht.
Me pak fjalë:
V1 është momenti kur avioni është angazhuar plotësisht për t’u ngritur dhe nuk ka më kthim pas.
