Rreth 721 mijë pensionistë në të gjithë vendin do të përfitojnë shpërblim në fund të këtij viti.
Qeveria ka miratuar një fond prej 9.7 miliardë lekësh (rreth 97 milionë euro) për bonusin e fundvitit, shumë që është gati trefish më e lartë se ajo e parashikuar fillimisht në buxhetin e shtetit, prej vetëm 3.5 miliardë lekësh.
Scan Tv raporton se bonusi do të jepet i diferencuar, në varësi të nivelit të pensionit mujor.
Mbi 511 mijë pensionistë, përfshirë edhe ata me pensione familjare apo invaliditeti, të cilët marrin deri në 20 mijë lekë në muaj, do të përfitojnë një bonus prej 15 mijë lekësh (rreth 150 euro). Vetëm për këtë kategori, fondi total i shpërndarjes kap vlerën e 76 milionë eurove.
Ndërsa 210 mijë pensionistë të tjerë, me pension mujor mbi 20 mijë lekë, do të marrin një bonus prej 10 mijë lekësh(rreth 100 euro), me një buxhet të dedikuar prej 21 milionë eurosh.
Sipas Ministrisë së Financave, skema e re synon të ofrojë më shumë mbështetje për pensionistët me të ardhura më të ulëta, duke ruajtur një ndarje të drejtë të fondit në bazë të nevojës ekonomike.
Në listën e përfituesve përfshihen të gjitha kategoritë e pensioneve, përfshirë:
pensionet e pleqërisë, të kooperativave dhe sociale,
pensionet e invalidëve të luftës dhe ato me dekret,
pensionet suplementare,
pensionet e ushtarakëve, oficerëve, minatorëve dhe akademikëve,
si edhe pensionet e personave me funksione kushtetuese dhe fëmijëve në përkujdesje të shtetit.
Kjo është hera e dytë brenda vitit që qeveria aplikon një shpërblim të tillë për pensionistët. Në dhjetor 2024, bonuset ishin në të njëjtat nivele prej 15 mijë dhe 10 mijë lekësh, ndërsa në pranverën e vitit 2025 u dhanë respektivisht 10 mijëdhe 5 mijë lekë, në varësi të pensionit mujor.
Bonusi i fundvitit për vitin 2025 konsiderohet më i madhi i dhënë ndonjëherë për pensionistët, si pjesë e politikës buxhetore për rritjen e mbështetjes sociale ndaj kësaj kategorie.
