Shqiptarët, si në Shqipëri ashtu edhe në Kosovë, mbeten qytetarët që sigurojnë më pak jetën e tyre në krahasim me vendet e tjera të Evropës Qendrore dhe Lindore.
Sipas raportit më të fundit të platformës ndërkombëtare të të dhënave të sigurimeve Xprimm, të dy vendet renditen në fund të listës për peshën që zë sigurimi i jetës ndaj produkteve të tjera të sigurimit.
Në këtë mënyrë familjet e marrin vetë përsipër rriskun duke mos praktikuar atë që prej dekadash bëjnë shoqëritë e zhvilluara.
Në Shqipëri, sigurimi i jetës përbën vetëm 9% të totalit të primeve të shkruara bruto, ndërsa tregu dominohet nga sigurimi i detyrueshëm motorik (MTPL), i cili zë afro 60% të tregut të përgjithshëm.
Megjithatë, tregu i sigurimeve të jetës ka shënuar një përmirësim të dukshëm këtë vit. Shqipëria dhe Hungaria kanë regjistruar rritjen më të madhe të primeve të sigurimit të jetës në gjysmën e parë të 2025-s, me një rritje prej 15%krahasuar me të njëjtën periudhë të një viti më parë.
Vlera totale e primeve arriti në 11.7 milionë euro, nga 10.2 milionë euro që ishte një vit më parë — një shenjë se tregu po rritet ngadalë, por në mënyrë të qëndrueshme.
Nga ana tjetër, Shqipëria renditet e katërta në Evropën Qendrore dhe Lindore për rritjen e dëmshpërblimeve, me një rritje prej 16% të dëmeve të paguara gjatë periudhës.
Të dhënat e Autoritetit të Mbikëqyrjes Financiare (AMF) tregojnë se sigurimi i jetës së debitorit është produkti më i përhapur në këtë kategori. Në tetë qarqe të vendit, ky është i vetmi lloj sigurimi jete që qytetarët zgjedhin, kryesisht për shkak se është kusht i vendosur nga bankat gjatë marrjes së kredive për pasuri apo banesa.
Kjo situatë tregon se, ndonëse shqiptarët po rrisin interesin për sigurimin e jetës, tregu ende mbetet i varur nga produktet e detyrueshme dhe jo nga ndërgjegjësimi individual për rëndësinë e mbrojtjes financiare afatgjatë. /skyweb.al
