Ndërprerja masive e shërbimeve të Microsoft ka hyrë në ditën e dytë, ndërsa rikthimi i plotë i Outlook, Teams dhe Copilot po rezulton shumë më i vështirë nga sa ishte parashikuar.
Problemi, që nisi të enjten, më 12 nëntor, ka shkaktuar ndërprerje të komunikimit elektronik për kompani, institucione shtetërore dhe përdorues në mbarë botën.
Por përse po zgjat kaq shumë rikthimi në normalitet?
Sipas shpjegimeve të Microsoft, një problem i krijuar gjatë një përmirësimi të mëparshëm të kapacitetit të rrjetit është shfaqur pas një ndryshimi të fundit në konfigurimin e tij.
Për pasojë, një numër i madh serverësh dolën papritur jashtë funksionit, duke detyruar sistemin të shpërndante kërkesat e përdoruesve te serverët e mbetur aktivë.
Kjo shkaktoi mbingarkesë dhe një efekt zinxhir në infrastrukturën e kompanisë.
Situata u ndërlikua edhe më shumë kur disa serverë, pasi riktheheshin në punë, bëheshin sërish të padisponueshëm sapo fillonin të merrnin kërkesa nga përdoruesit.
Për këtë arsye, rinisja e serverëve dhe ridrejtimi i trafikut nuk dhanë menjëherë rezultatet e pritshme.
Microsoft u detyrua të izolonte pjesë të infrastrukturës, të kufizonte përkohësisht disa kërkesa dhe të rikthente gradualisht serverët, duke kontrolluar nëse ata qëndronin funksionalë.
Kompania ka konfirmuar se problemi themelor është adresuar, ndërsa shërbimet po rikthehen në mënyrë të kontrolluar për të shmangur një tjetër mbingarkesë.
Sipas përditësimit të fundit, është konstatuar përmirësim i ndjeshëm i funksionimit të shërbimeve, megjithëse një pjesë e përdoruesve mund të vijojnë të përballen me probleme lidhjeje ose vonesa në dërgimin e emaileve.
Microsoft ka sqaruar gjithashtu se ndërprerja ka pasur natyrë teknike dhe nuk lidhet me sulme kibernetike apo sistemet e inteligjencës artificiale.
Megjithëse rikuperimi po përparon, kompania nuk ka përcaktuar ende një afat përfundimtar për normalizimin e plotë të të gjitha shërbimeve. /skyweb.al
