Debati se hetimet, arrestimet dhe dënimet e politikanëve apo zyrtarëve të korruptuar nuk po shoqërohen me sekuestrimin dhe konfiskimin e pasurive të tyre është shtuar së fundmi në Shqipëri. Shqetësimi lidhet me faktin se zyrtarë të dënuar për korrupsion mund të kryejnë disa vite burg dhe më pas të dalin duke gëzuar pasuritë e përfituara në mënyrë të paligjshme, pa i kthyer paratë në arkën e shtetit.
Pikërisht këtë problem e nxjerr në pah edhe Bashkimi Europian në Progres-Raportin për Shqipërinë, të publikuar më 4 nëntor 2026, ku shifrat tregojnë një hendek të madh mes goditjes penale të korrupsionit dhe rikuperimit të pasurive të përfituara prej tij.
Sipas Komisionit Europian, gjatë vitit 2025, SPAK ka sekuestruar dhe konfiskuar në total pasuri me vlerë 45.4 milionë euro. Por nga kjo shumë, vetëm 1.2 milionë euro lidhen me procedimet për korrupsionin e nivelit të lartë.
Edhe më shqetësues është fakti se vlera e pasurive të konfiskuara përfundimisht nga këto procedime ka qenë vetëm rreth 100 mijë euro.
Pra, ndërsa hetimet për korrupsionin e zyrtarëve të lartë kanë prodhuar arrestime, procese gjyqësore dhe dënime, konfiskimi përfundimtar i pasurive mbetet në nivele minimale.
Komisioni Europian evidenton gjithashtu se numri i vendimeve për konfiskimin e pasurive ka rënë ndjeshëm, nga 20 në vetëm 8.
Madje, gjatë vitit 2025, SPAK nuk ka marrë asnjë vendim për sekuestrimin e pasurive në çështjet që lidhen me veprat penale të korrupsionit të thjeshtë.
Këto të dhëna nxjerrin në pah një nga problemet kryesore të luftës kundër korrupsionit në Shqipëri: ndëshkimin e personave të përfshirë në afera, pa arritur në të njëjtën masë edhe te pasuritë e përfituara prej tyre.
Në praktikë, kjo krijon rrezikun që dënimi me burg të mos shoqërohet me humbjen e përfitimeve financiare nga korrupsioni, duke lënë të paprekur një pjesë të rëndësishme të pasurive.
Komisioni Europian thekson se raporti mes pasurive të sekuestruara dhe atyre të konfiskuara mbetet i pakënaqshëm, pavarësisht përmirësimit të kapaciteteve të SPAK për hetimet financiare.
Brukseli kërkon përdorimin më të gjerë të konfiskimit të zgjeruar, konfiskimit pa një vendim penal dënimi, si dhe masave që mundësojnë marrjen e pasurive të regjistruara në emër të personave të tretë.
Raporti evidenton gjithashtu se hetimet për korrupsionin e nivelit të lartë vazhdojnë të përqendrohen në tri fusha kryesore: shëndetësinë, teknologjinë e informacionit dhe tenderat e infrastrukturës.
Bëhet fjalë për sektorë ku qarkullojnë shuma të mëdha të parave publike dhe ku gjatë viteve të fundit janë regjistruar disa nga hetimet më të rëndësishme të SPAK.
Gjetjet e BE-së rikthejnë kështu pyetjen se sa efektive është lufta kundër korrupsionit nëse zyrtarët përfundojnë në burg, por pasuritë e krijuara përmes abuzimit me fondet publike nuk konfiskohen dhe nuk rikthehen në arkën e shtetit.
Për Brukselin, sfida nuk është më vetëm hetimi dhe dënimi i korrupsionit, por edhe identifikimi, gjurmimi dhe konfiskimi përfundimtar i përfitimeve financiare që burojnë prej tij. /skyweb.al
