Kompania ajrore me kosto të ulët, Spirit Airlines, ka kryer fluturimin e saj të fundit, duke i dhënë fund një historie 34-vjeçare që ndryshoi mënyrën se si funksionon industria e aviacionit.
Fluturimi i fundit u nis nga Detroit dhe u ul në Dallas, duke shënuar mbylljen zyrtare të operacioneve të kompanisë, e njohur për avionët e saj të verdhë dhe çmimet minimale që tronditën tregun për dekada.
Në një deklaratë, drejtori ekzekutiv Dave Davis theksoi rolin që kompania ka pasur në industrinë e udhëtimeve. “Për më shumë se 30 vite, Spirit Airlines ka luajtur një rol pionier në bërjen e udhëtimeve më të aksesueshme dhe në uljen e kostove në të gjithë industrinë,” u shpreh ai.
Mbyllja e kompanisë vjen pas një periudhe të gjatë vështirësish financiare, përfshirë dy falimentime në dy vitet e fundit dhe përpjekje intensive për të mbijetuar përmes reduktimit të linjave, uljes së kostove dhe negociatave për financim të ri. Një plan i mundshëm shpëtimi me mbështetjen e qeverisë amerikane nuk u realizua.
Goditja përfundimtare erdhi nga rritja e ndjeshme e çmimeve të karburantit, e lidhur me luftën Iran-SHBA, që përshpejtoi humbjet financiare dhe e detyroi kompaninë të ndërpresë aktivitetin.
Spirit e nisi aktivitetin në vitet ’80 si Charter One Airlines, duke ofruar ture turistike, përpara se të transformohej në një nga pionierët e modelit “low-cost” në SHBA.
Me strategjinë e tarifave të ndara, kompania u jepte pasagjerëve mundësinë të paguanin vetëm për shërbimet që përdornin, nga bagazhet te zgjedhja e vendit.
Ky model, edhe pse shpesh i kritikuar nga pasagjerët, ndikoi ndjeshëm industrinë, duke detyruar edhe kompanitë e mëdha ajrore të ulnin çmimet dhe të prezantonin tarifa bazë më të lira.
Dikur e vlerësuar deri në 5.5 miliardë dollarë në bursë, Spirit Airlines mbyllet duke lënë pas një ndikim të madh në treg, si kompania që e bëri udhëtimin ajror më të lirë, por që nuk arriti t’i mbijetojë krizave të fundit ekonomike dhe gjeopolitike. /AP
