Kompania ajrore me kosto të ulët Ryanair ka njoftuar ndryshime në procedurat e regjistrimit të pasagjerëve dhe dorëzimit të bagazheve, të cilat do të hyjnë në fuqi më 10 nëntor 2026.
Sipas rregullit të ri, sportelet e check-in dhe të dorëzimit të bagazheve do të mbyllen 60 minuta përpara nisjes së planifikuar të avionit, nga 40 minuta që është afati aktual.
Kjo do të thotë se pasagjerët do të kenë 20 minuta më pak kohë për të përfunduar procedurat në aeroport.
Ndryshimi është veçanërisht i rëndësishëm për udhëtarët që kanë bagazhe për të dorëzuar, pasi vonesa përtej afatit mund t’u kushtojë humbjen e fluturimit, edhe nëse avioni ndodhet ende në aeroport.
Për shembull, nëse një fluturim është planifikuar të niset në orën 12:00, pasagjerët duhet të kenë përfunduar dorëzimin e bagazheve jo më vonë se ora 11:00.
Deri më tani, ky proces mund të kryhej deri në orën 11:20.
Ryanair e ka argumentuar ndryshimin me nevojën për të shmangur vonesat dhe për të përmirësuar menaxhimin e fluturimeve, në kushtet kur aeroportet europiane përballen shpesh me radhë të gjata në kontrollet e sigurisë dhe të pasaportave.
Megjithatë, rregulli nuk ndryshon procedurat për pasagjerët që kanë kryer check-in online dhe udhëtojnë vetëm me bagazh dore.
Ata mund të vijojnë drejtpërdrejt drejt kontrollit të sigurisë dhe portës së imbarkimit, duke respektuar afatet përkatëse.
Kompania u rekomandon udhëtarëve të paraqiten në aeroport të paktën dy orë përpara nisjes së fluturimit.
Rregulli i ri do të zbatohet në aeroportet ku operon Ryanair, ndaj pasagjerët që udhëtojnë me këtë kompani duhet të tregojnë kujdes të shtuar me oraret, veçanërisht kur kanë bagazhe për të dorëzuar. /skyweb.al
