Kryeministri Edi Rama ka njoftuar një skemë të re mbështetjeje financiare për familjet me fëmijë dhe rritjen e ndihmës ekonomike për studentët që vijnë nga familje në nevojë. Gjatë mbledhjes së Këshillit Kombëtar për të Drejtat dhe Mbrojtjen e Fëmijëve, kreu i qeverisë bëri të ditur se këto masa janë parashikuar në buxhetin e ri.
Sipas Ramës, bonusi i bebes do të transformohet në një skemë të rregullt mbështetjeje mujore për fëmijët, me synimin për të ndihmuar drejtpërdrejt të ardhurat e familjeve.
“Ne sot kemi një subvencionim të sigurimeve shoqërore dhe shëndetësore për të gjitha nënat e papuna që rrisin fëmijë të mitur dhe që janë kryefamiljare, por nuk mjafton. Në buxhetin e ri kemi vendosur që bonusin e bebes ta transformojmë në një skemë mbështetjeje të rregullt për fëmijët çdo muaj, që të ndikojmë në të ardhurat e familjeve që kanë një fëmijë më shumë”, u shpreh Rama.
Një tjetër masë e paralajmëruar lidhet me studentët nga familjet në nevojë. Sipas kryeministrit, mbështetja financiare për këtë kategori do të rritet më shumë se dyfish, duke arritur në nivelin e gjysmës së pagës minimale.
Gjatë fjalës së tij, Rama u ndal edhe te ndikimi i rrjeteve sociale, veçanërisht tek të miturit, duke argumentuar se përdorimi i tyre po nxit izolimin dhe po dobëson ndërveprimin fizik mes njerëzve.
“Unë besoj shumë fort që kjo situatë e re, e gatuar me vite në Europë dhe në Shqipëri, si rezultat i arsyeve që janë sa të ngjashme, aq edhe të ndryshme, kërkon një qasje të re ndaj gjithçkaje që ndihmon socializimin fizik të njerëzve. Rrjetet sociale kanë stimuluar një vetmi të një natyre shumë të rrezikshme për bashkëjetesën demokratike në një hapësirë sociale të përbashkët”, deklaroi kryeministri.
Në këtë kuadër, ai bëri thirrje për hapjen e një debati publik mbi kufizimin e aksesit të të miturve në rrjetet sociale, duke shqyrtuar mundësinë e vendosjes së një kufiri moshe 16 ose 18 vjeç.
“Duhet hapur debati se si dhe kur duhet të kufizojmë aksesin në rrjetet sociale të të miturve, deri në çfarë kufiri moshe, 16 apo 18 vjeç, që të mos kenë më asnjë mundësi që të kenë rrjetet e tyre sociale individuale”, u shpreh Rama.
Kryeministri bëri të ditur se për këtë çështje do të nisë një proces konsultimi me mësuesit, prindërit dhe shkollat, duke iu referuar edhe konsultimit të mëparshëm për kufizimin e TikTok-ut.
“Ne do të fillojmë një konsultim, siç bëmë në rastin kur na u desh të kufizonim TikTok-un. Do të fillojmë një diskutim me mësuesit, prindërit dhe shkollat për kufizimin e rrjeteve sociale për të miturit”, përfundoi Rama. /skyweb.al
