Rastet e dyshuara të kontrabandës së naftës nga Shqipëria drejt Kosovës, përmes Doganës së Morinës dhe manovrave të pretenduara në procedurat doganore, janë denoncuar vazhdimisht në mediat e të dy vendeve.
Ndërkohë, së fundmi ka dalë në dritë një tjetër rast konkret, i cili ngre pikëpyetje serioze mbi funksionimin e kontrolleve dhe kërkon verifikime nga strukturat përgjegjëse të Drejtorisë së Përgjithshme të Doganave.
Bëhet fjalë për një autobot të ngarkuar me naftë, i cili ishte nisur nga Durrësi drejt Kosovës dhe është ndaluar në Morinë pas konstatimit të parregullsive në elementët e sigurisë doganore.
Sipas të dhënave të denoncimit, ngarkesa udhëtonte me praktikën e tranzitit nr. 5271, datë 28 gusht 2026, me autobotin me targa AB73*ZH / 0541*XC. Mjeti transportonte gasoil, me pronar të deklaruar të ngarkesës shtetasin kosovar Burim V., ndërsa drejtohej nga shoferi Vjonis B..
Gjatë kontrollit nga shërbimet doganore dhe grupi i antikontrabandës tokësore në Morinë, mësohet se janë konstatuar parregullsi në plumbçet doganore me numrat 26ALP1103185 dhe 26ALP1103186.
Parregullsia është referuar nga doganierët që e kanë konstatuar atë, pikërisht te Departamenti Operativ Hetimor, përmes Sektorit të Monitorimit duke vënë në dijeni Drejtorinë e Hetimit për rastin.
Konstatimi i parregullsive në plumbçet doganore kërkon verifikimin e integritetit të ngarkesës, pasi këta elementë shërbejnë për të garantuar që malli nuk është hapur apo manipuluar gjatë tranzitit. Kjo, pasi në rast të kundërt situata referon për kontrabandë naftë.
Por, autoboti është mbajtur i bllokuar për katër ditë dhe më pas është lejuar të vijojë rrugën, duke ngritur pikëpyetje mbi mënyrën se si është përfunduar procedura pas ndërhyrjes së Zv.Drejtorit të Doganave, z.Erald Delilaj.
Rrethanat e rënda të përshkruara në ankesë kërkojnë verifikimin e dokumentacionit të procedurës, veçanërisht nëse është konstatuar zyrtarisht shkelja, çfarë masash janë marrë dhe mbi çfarë baze është lejuar vijimi i tranzitit.
Kush e autorizoi lirimin e autobotit pas katër ditësh? A u krye kontroll fizik i plotë i ngarkesës dhe a u verifikua sasia e naftës? Ku ndodhen procesverbalet dhe aktet përfundimtare të kësaj procedure?
Këto janë pyetje që duhet të marrin përgjigje nga Drejtoria e Përgjithshme e Doganave dhe organet kompetente të hetimit./skyweb.al
