Qeveria po përgatit një tjetër rritje të taksës së pronës për ndërtesat e banimit, duke synuar veçanërisht pronarët e apartamenteve të dyta, vilave në bregdet dhe banesave që mbahen bosh.
Ministria e Financave po përgatit një kuadër të ri ligjor për rritjen e mëtejshme të shkallës së taksimit të pronave rezidenciale, përtej niveleve të propozuara në draftet e mëparshme.
Sipas Monitor, Financat po shqyrtojnë një tjetër rritje të këtyre normave, ndërsa intervalet e reja të taksimit ende nuk janë përcaktuar përfundimisht.
Ndryshimet vijnë pas paralajmërimit të kryeministrit Edi Rama për vendosjen e një supertakse ndaj pronarëve që mbajnë apartamente bosh dhe atyre që zotërojnë vila në zonat bregdetare.
Pavarësisht rritjes së parashikuar të normave, qeveria nuk planifikon të ndryshojë formulën e llogaritjes së taksës, e cila parashikon trajtim të diferencuar për banesën e parë dhe pronat e tjera.
Për banesën e parë do të vijojë të zbatohet zbritja e 50% të vlerës së pronës nga baza e tatueshme, por kjo lehtësi do të kufizohet nga një prag maksimal që ndryshon sipas bashkive.
Në projektligj, bashkitë ndahen në shtatë kategori, ndërsa Tirana ka pragun më të lartë të vlerës së patatueshme, deri në 8.4 milionë lekë, nga 4.5 milionë lekë që ishte propozuar në draftin e mëparshëm.
Situata ndryshon për pronarët e banesave të dyta, të cilët nuk do të përfitojnë nga kjo lehtësi fiskale.
Për këto prona, taksa do të llogaritet mbi të gjithë vlerën e tatueshme të apartamentit apo vilës, duke aplikuar shkallën e re që do të përcaktohet nga qeveria.
Kjo do të thotë se pronarët që zotërojnë disa apartamente, vila pushimi apo banesa të pashfrytëzuara pritet të përballen me një faturë ndjeshëm më të lartë.
Një nga objektivat e shpallura nga qeveria është nxitja e pronarëve për të nxjerrë në tregun e qirasë apartamentet që aktualisht qëndrojnë bosh.
Rama ka paralajmëruar gjithashtu taksim më të lartë për vilat në bregdet dhe shumëfishimin e çmimit të ujit që përdoret për mbushjen e pishinave.
Një tjetër ndryshim i rëndësishëm lidhet me mënyrën e vlerësimit të pasurive. Taksa e re do të mbështetet në vlerën e përafërt të tregut të pronës, nëpërmjet të dhënave që do të administrohen në Kadastrën Fiskale.
Në këtë sistem parashikohet të regjistrohen të dhënat e rreth 3 milionë pasurive të paluajtshme, proces që ka ndikuar edhe në shtyrjen e reformës gjatë viteve të fundit.
Sipas afateve të përcaktuara në projektligjin e publikuar për konsultim, formula e re e taksimit për ndërtesat pritet të nisë nga viti 2029, ndërsa për trojet dhe tokën bujqësore nga viti 2030.
Rritja e re e normave pritet të rëndojë veçanërisht mbi pronarët e pasurive me vlerë të lartë, banesave të dyta dhe apartamenteve që qëndrojnë bosh në qytetet me çmime të larta të tregut imobiliar. /skyweb.al
