Vitet e fundit është vërejtur një rritje e ndjeshme e rasteve të miopisë në nivel global, veçanërisht tek fëmijët dhe adoleshentët. Për një kohë të gjatë, ky fenomen i është atribuar kryesisht përdorimit të zgjatur të ekraneve dhe kohës së tepërt përpara telefonave inteligjentë dhe kompjuterëve.
Megjithatë, një studim i ri i publikuar në revistën shkencore Cell Reports nga studiues të SUNY College of Optometry, sugjeron se shkaku kryesor mund të mos jenë vetëm ekranet, por mënyra se si përdorim sytë në ambiente të mbyllura, konkretisht, fokusimi i zgjatur në objekte të afërta nën ndriçim të dobët.
Sipas drejtuesit të studimit, Jose-Manuel Alonso, miopia ka arritur nivele shumë të larta në mbarë botën, ndërkohë që shkaqet e saj ende nuk janë kuptuar plotësisht. Hulumtimi i fundit hedh hipotezën se ndriçimi dhe modelet vizuale luajnë një rol kyç në zhvillimin e kësaj problematike.
Çfarë ndryshon kjo qasje?
Miopia nuk lidhet vetëm me kohën përpara ekranit, por me kombinimin e dy faktorëve: fokusimi i vazhdueshëm në distanca të afërta (lexim, përdorim celulari apo kompjuteri) dhe ndriçimi i ulët në ambient.
Në kushte me dritë të pamjaftueshme, sasia e dritës që arrin në retinë reduktohet ndjeshëm. Sipas studiuesve, kjo mund të ndikojë në mekanizmat e rritjes së syrit dhe të kontribuojë në përkeqësimin e miopisë.
Kjo qasje e re mund të shpjegojë pse faktorë të ndryshëm, si përdorimi i ekraneve, ndriçimi, kohëzgjatja e punës në afërsi apo edhe trajtime të caktuara, ndikojnë në mënyra të ndryshme në progresin e miopisë.
Por, si mund të ndikojë në përditshmëri?
– Miopia mund të lidhet me sjelljen e përgjithshme vizuale në ambiente të brendshme, jo vetëm me teknologjinë.
-Niveli i ndriçimit gjatë aktiviteteve në afërsi (lexim, telefon, kompjuter) mund të jetë po aq i rëndësishëm sa koha e ekspozimit.
– Alternimi i fokusit në distanca të ndryshme dhe ekspozimi në ndriçim të mirë mund të ndihmojnë në parandalimin ose ngadalësimin e progresit të miopisë.
Edhe pse nevojiten studime të mëtejshme për konfirmim, ekspertët theksojnë se ndriçimi i mjaftueshëm dhe pushimet e rregullta gjatë punës në afërsi mund të luajnë një rol të rëndësishëm në mbrojtjen e shikimit, sidomos tek fëmijët dhe adoleshentët, ku rritja e rasteve të miopisë është më e theksuar.
