Ish-zëvendësministrja e Financave, Adela Xhemali, është propozuar nga Këshilli i Ministrave për të drejtuar Autoritetin e Mbikëqyrjes Financiare për pesë vitet e ardhshme. Kandidatura e saj u prezantua sot në Komisionin Parlamentar të Ekonomisë, ku Xhemali shpalosi vizionin dhe prioritetet për drejtimin e institucionit.
Ajo theksoi se AMF ka rol thelbësor në garantimin e funksionimit të tregjeve financiare jo-bankare dhe në mbrojtjen e investitorëve, ndërsa synimi i saj është zgjerimi i tregut të sigurimeve, zhvillimi i tregut të kapitaleve, forcimi i fondeve të pensioneve dhe nxitja e financimeve të gjelbra.
“Dua të theksoj se fokusi im do të jetë zhvillimi i mëtejshëm i tregut të sigurimeve, diversifikimi i produkteve dhe një mbikëqyrje e bazuar në risk. Standardet e reja të raportimit financiar dhe konkurrenca që sjell integrimi europian kërkojnë një qasje më dinamike nga AMF. Po ashtu, duhet të krijojmë një ambient real për investime afatgjata përmes forcimit të tregut të kapitaleve dhe bursës”, deklaroi Xhemali.
Ajo tha se rëndësi të veçantë do të ketë mbrojtja e konsumatorit, edukimi financiar dhe përmirësimi i qeverisjes korporative. Ndër prioritetet e saj është edhe promovimi i obligacioneve të gjelbra dhe produkteve të tjera të qëndrueshme financiare.
E pyetur se cili do të ishte vendimi i parë nëse merr drejtimin e AMF-së, Xhemali u shpreh se sfida më e madhe është përgatitja për integrimin në tregun e përbashkët europian.
“AMF duhet të jetë mjaftueshëm e fortë për të zhvilluar dhe konsoliduar tregjet. Jemi në një moment ku nuk mund të ketë zhvillim pa konsolidim. Gjëja e parë që do të bëj është shqyrtimi i të gjitha rekomandimeve të marra nga autoritetet vendase dhe ndërkombëtare. Ndërsa tregu shqiptar bëhet pjesë e tregut të madh europian, duhet të punojmë paralelisht për rritjen e konkurrueshmërisë dhe forcimin e rregullatorit”, tha ajo.
Xhemali theksoi se është e domosdoshme që të ndryshohet ligji organik i AMF-së dhe legjislacioni për tregjet financiare, por këto ndryshime duhet të bëhen me kujdes, në mënyrë që tregu të ketë stimul për rritje, por edhe mbështetje për t’u përballur me konkurrencën, duke pasur parasysh se ai mbetet i vogël dhe i brishtë.
Mbetet për t’u parë nëse Xhemali do të arrijë ta fusë në funksion AMF-në, e cila gjatë drejtimit të Mimoza Kaçit ka qenë një istitucion terësisht i atrofizuar, pavarësisht rolit tepër të rendësishëm që ka në treg. /skyweb.al
