Tregu shqiptar i automjeteve po tregon një dinamikë të re drejt mjeteve më të reja dhe më pak ndotëse, megjithëse makinat elektrike përbëjnë ende një pjesë të vogël të flotës totale në qarkullim.
Sipas të dhënave zyrtare të DPSHTRR, vetëm gjatë periudhës janar–tetor 2025 janë regjistruar 16,529 mjete me moshë 0–4 vjeç, një rritje prej 61% krahasuar me një vit më parë. Në total, për herë të parë janë regjistruar 82,814 mjete në këtë periudhë, ose 99% më shumë se në vitin 2019. Prej tyre, 67,603 janë autovetura, duke përbërë 81.6% të totalit.
Rritja më e shpejtë i përket mjeteve All-Electric. Nga viti 2019 deri në tetor 2025 janë regjistruar 10,990 automjete plotësisht elektrike, një rritje prej 72% vetëm krahasuar me vitin 2024. Në segmentin e automjeteve të reja “me km 0”, 42.4% e regjistrimeve të këtij viti janë makina 100% elektrike, një rritje prej 62% në raport me një vit më parë.
Paralelisht me rritjen e mjeteve elektrike, është zgjeruar ndjeshëm edhe harta e origjinës së automjeteve që hyjnë në Shqipëri. Vetëm në tetor 2025, përqindjet e regjistrimeve sipas vendeve të prodhimit ishin:
Republika e Koresë – 21.4%
Itali – 15.5%
Gjermani – 15.5%
Kinë – 8.7%
Zvicër – 8.4%
Shtetet e Bashkuara të Amerikës – 8%
Të dhënat tregojnë se tregu po zhvendoset drejt mjeteve më të reja dhe teknologjikisht më të avancuara, por makinat elektrike mbeten ende një segment në zhvillim, larg peshës që mbajnë në vendet e BE-së.
