Çdo shqiptar prodhoi mesatarisht 383 kilogramë mbetje gjatë vitit 2025, ose 23 kilogramë më shumë se një vit më parë.
Të dhënat e INSTAT për mbetjet e ngurta urbane tregojnë se në vitin 2025 në Shqipëri u menaxhuan gjithsej 900.8 mijë tonë mbetje, me një rritje prej 4.5% krahasuar me vitin 2024.
Por problemi kryesor mbetet mënyra se si trajtohen këto mbetje. Sipas raportit, 77% e tyre u depozituan në landfill, ndërsa vetëm 18% u ricikluan.
Pra, pavarësisht miliona eurove të shpenzuara ndër vite për projektet e inceneratorëve, pjesa dërrmuese e mbetjeve në Shqipëri vijon të groposet. Afera e inceneratorëve, e cila është kthyer në një nga dosjet më të mëdha të korrupsionit në vend, nuk prodhoi zgjidhje reale për trajtimin modern të mbetjeve.
Në vend që mbetjet të përpunoheshin, digjeshin apo ricikloheshin në shkallë më të lartë, Shqipëria vijon të mbështetet kryesisht te landfill-et.
Sipas të dhënave, në vitin 2023 në vend u menaxhuan 844.157 tonë mbetje, në vitin 2024 kjo shifër u rrit në 862.241 tonë, ndërsa në vitin 2025 arriti në 900.782 tonë.
Edhe mbetjet për banor janë rritur ndjeshëm. Në vitin 2023, çdo banor prodhoi mesatarisht 351 kg mbetje në vit. Në vitin 2024, kjo shifër shkoi në 360 kg, ndërsa në vitin 2025 arriti në 383 kg.
Nga këto, 341 kg për banor janë mbetje urbane, ndërsa 42 kg për banor janë mbetje jo urbane.
Raporti tregon gjithashtu se 90.3% e popullsisë mbulohet nga shërbimi i grumbullimit të mbetjeve. Megjithatë, mbulimi me shërbim nuk është përkthyer në trajtim më të mirë të tyre, pasi depozitimi në landfill mbetet forma kryesore.
Të dhënat tregojnë se Shqipëria po prodhon më shumë mbetje, por riciklimi mbetet pothuajse në vendnumëro. Në vitin 2025, pesha e mbetjeve të ricikluara ishte rreth 18%, pothuajse e pandryshuar nga viti 2024.
Kjo do të thotë se problemi nuk është vetëm te sasia e mbetjeve që po rritet, por edhe te modeli i trajtimit. Shqipëria mbledh mbetje, por në pjesën më të madhe ende i gropos ato. /skyweb.al
