Një ditë pas prezantimit të studimit të fizibilitetit për hekurudhën Durrës-Prishtinë, kreu i Hekurudhave, Ergys Verdho, në një intervistë televizive në ABC News, deklaroi se “Hekurudha Kuqezi”, do të sjellë rritja ekonomike dhe zhvillim në fshatrat e thellë, ku është projektuar të kalojë.
“Lidh komplet zonën e Malit të Zi dhe Kroacisë, për të mos kaluar në linjat hekurudhore serbe, si edhe krijon lidhje me Porto Romanon. Kemi dhe linjën e Korridorit 8 dhe atë të 9. Fillon si një projekt kombëtar, pastaj duke u lidhur me korridorin 8 shndërrohet në një projekt ndërkombëtar”, u shpreh Verdho.
Verdho foli dhe për koston e projektit dhe afatet e parashikuara për ndërtim.
“Kostoja e projektit është llogaritur përafërsisht 1.8 miliard Euro. Projekti i detajuar inxhinjerik do të nxjerrë edhe vlerën e saktë. Ecuria sipas afateve të përcaktuara nga konsulenti është 1 vit për studimin, 1 vit për prokurimin, 7 vite për ndërtimin e hekurudhës dhe 1 vit do të jetë kolaudimi. Pra, për një periudhë 10- vjeçare do jetë gati. Megjithatë ne duhet të gjejmë mënyrën e duhur të financimit dhe realizimit për të përmbyllur më shpejt këtë projekt”, u shpreh kreu i Hekurudhave Shqiptare.
Verdho vuri në dukje se nga Durrësi në Gjakovë distanca do të përshkohet për 3 orë, me një tren të shpejtësisë 120 km/h. Kreu i HSH tha se segmenti do të jetë smart si në sinjalistikë, telekomunikacion e gjithçka.
Hekurudha e cila ka marrë emrin “Kuqezi”, do të jetë e gjatë 105.8 km, do të ketë 43 ura, 14 tunele dhe 7 stacione të reja.
