Autoriteti Rrugor Shqiptar planifikon të hapë në dhjetor tenderin për studimin dhe projektimin e hyrjes së re veriore të Tiranës, që synon të lidhë drejtpërdrejt autostradat e veriut me unazën e re të kryeqytetit, duke anashkaluar Kamzën. Sipas të dhënave të publikuara për procedurën e parashikuar, fondi limit për këtë shërbim është 167 milionë lekë. Projekti ishte paralajmëruar për TV SCAN edhe nga drejtori i Autoritetit Rrugor Shqiptar, Ami Kozeli. Sipas tij projektimi i hyrjes veriore është pjesë e masave për lehtësimin e trafikut në kryeqytet, përmes krijimit të një lidhjeje të re për lëvizjen drejt veriut dhe anasjelltas.
Aktualisht, një pjesë e konsiderueshme e automjeteve që vijnë nga veriu kalon përmes nyjes së Kamzës për t’u lidhur me rrugët kryesore të Tiranës. Korridori i ri synon të krijojë një alternativë për këtë fluks, veçanërisht për automjetet tranzit, duke ulur ngarkesën në hyrjen ekzistuese të kryeqytetit.
Një tjetër procedurë e rëndësishme që ARRSH synon të hapë në dhjetor është studimi dhe projektimi për zgjerimin e rrugës Levan – Gjirokastër. Për këtë shërbim është parashikuar një fond limit prej 120 mln lekësh. Projekti synon zgjerimin e një aksi kryesor për lëvizjen drejt jugut të vendit, ndërsa përmasat dhe ndërhyrjet konkrete do të përcaktohen gjatë projektimit.
Lista e ARRSH-së përfshin edhe studime e projektime për rrugë të tjera në veri. Për aksin Koplik – Razëm – Bogë – Theth është parashikuar një fond limit prej rreth 46,1 mln lekësh, ndërsa për rrugën Kryqëzim Koman – Pukë – Fushë-Arrëz, fondi arrin në 39,1 mln lekë. Po ashtu, parashikohet edhe tenderi për studimin dhe projektimin e rehabilitimit të rrugës Rrëshen – Burrel, me fond limit prej 9,3 mln lekë.
Krahas shërbimeve të projektimit, Autoriteti Rrugor Shqiptar ka përfshirë në listë edhe një procedurë për punime sistemimi dhe asfaltimi të rrugëve të Drejtorisë së Rajonit Qendër – Lindje, Korçë. Fondi limit për këto punime është 200 mln milionë lekë.
Në total, 6 procedurat e parashikuara kapin një fond limit prej rreth 681,5 mln lekësh.
