Pas euros, edhe dollari amerikan ka pësuar një tjetër rënie të fortë përballë lekut, duke zbritur këtë të mërkurë nën kufirin e 80 lekëve.
Në tregun vendas valutor, dollari blihet me 79.9 lekë dhe shitet me 81.1 lekë, duke prekur një prej niveleve më të ulëta të regjistruara prej kohësh.
Rënia e monedhës amerikane vjen në një moment kur edhe euro vijon të qëndrojë në nivele shumë të dobëta ndaj monedhës shqiptare.
Euro ka shënuar një rritje të lehtë krahasuar me një ditë më parë, por vazhdon të blihet me vetëm 92.4 lekë dhe të shitet me 93.4 lekë.
Forcimi i lekut ndaj dy monedhave kryesore ndërkombëtare po vijon kështu edhe në mesin e muajit gusht, me dollarin që tashmë ka kaluar poshtë nivelit simbolik të 80 lekëve në blerje.
Franga zvicerane ka shfaqur ndërkohë luhatje, duke u blerë me 98.4 lekë dhe shitur me 100 lekë.
Në drejtim të kundërt ka lëvizur paundi britanik, i cili është forcuar krahasuar me një ditë më parë. Paundi blihet me 107.8 lekë dhe shitet me 109 lekë.
