Ish-deputetja e Partisë Demokratike, Zheni Gjergji, është emëruar drejtoreshë e Spitalit Rajonal “Dr. Xhaferr Kongoli” në Elbasan.
Lajmin e ka bërë publik vetë ajo në një postim në rrjetet sociale, ku shprehet se vendimi për të marrë këtë detyrë ishte “një zgjedhje e vështirë, por thellësisht profesionale dhe njerëzore”.
“Pavarësisht angazhimit tim të mëparshëm politik, unë kam qenë dhe mbetem mjeke.
Profesioni im është thirrje, jo pozicion”, shkruan Gjergji, duke theksuar se synon të kontribuojë për përmirësimin e shërbimeve në spitalin e qytetit të saj.
Në mesazhin e saj, ajo shton se e ndjen këtë detyrë si përgjegjësi të madhe dhe nder njëkohësisht. “Elbasani është qyteti im, vendi ku jam rritur dhe ku kam ndërtuar identitetin tim profesional. Të jem në krye të institucionit më të rëndësishëm shëndetësor të këtij qyteti është për mua një sfidë që kërkon përkushtim, dije dhe ndershmëri”, shprehet ajo.
Zheni Gjergji, e njohur edhe si Zheni Bebi Gjergji, ka ushtruar më herët profesionin e mjekes dhe është angazhuar në politikë si deputete e PD-së, ndërsa tani rikthehet në sistemin shëndetësor për të drejtuar spitalin rajonal të Elbasanit. /skyweb.al
