Statistikat e INSTAT tregojnë një tablo të qartë mbi shkaqet kryesore të vdekjeve në Shqipëri dhe diferencat mes burrave dhe grave.
Te burrat, numri më i madh i humbjeve të jetës lidhet me sëmundjet e aparatit të qarkullimit të gjakut, me një shkallë prej gati 500 raste për 100 mijë banorë, duke i bërë ato shkakun kryesor të vdekshmërisë, raporton skyweb.al.
Po ashtu, tumoret përbëjnë një tjetër grup madhor, me 147.6 raste për 100 mijë burra.
Edhe te gratë, panorama është e ngjashme: sëmundjet e zemrës dhe qarkullimit të gjakut dominojnë, duke shkaktuar 442.6 vdekje për 100 mijë banore, ndërsa tumoret renditen të dytat, me 85.7 raste.
Megjithatë, në dallim nga burrat, gratë kanë një incidencë më të lartë të vdekjeve të lidhura me sëmundjet mendore dhe me simptoma apo shenja të paqarta klinike, ku normat janë dukshëm më të larta se tek burrat (189 kundrejt 161.3 raste).
Një tjetër element që spikat është se burrat kanë norma më të larta vdekshmërie nga sëmundjet e aparatit të frymëmarrjes dhe dëmtimet traumatike, ndërsa tek gratë më të pranishme janë vdekjet nga sëmundjet endokrine dhe çrregullimet ushqimore.
Në përmbledhje, të dhënat tregojnë se zemra dhe tumoret mbeten shkaqet kryesore të vdekjes për të dyja gjinitë, por burrat humbin më shumë jetë nga sëmundjet respiratore dhe traumat, ndërsa gratë nga shkaqe të lidhura me shëndetin mendor dhe sëmundjet endokrine. /skyweb.al
