Punëdhënësit do të kenë detyrime të reja për mënyrën si raportojnë punësimet dhe largimet nga puna, sipas ndryshimeve të propozuara në ligjin “Për nxitjen e punësimit”.
Një nga risitë kryesore është se çdo largim nga puna do të duhet të deklarohet, ndërsa bashkë me të punëdhënësi duhet të raportojë edhe arsyen e largimit dhe kontaktin e punonjësit. Këto të dhëna do t’i përcillen automatikisht institucionit përgjegjës për punësimin dhe zyrës që mbulon vendbanimin e punonjësit.
Qëllimi është që personi që humbet vendin e punës të identifikohet menjëherë nga strukturat shtetërore dhe të mund të marrë më shpejt këshillim, orientim profesional, ndërmjetësim për një vend tjetër pune apo përfshirje në programe aktive të punësimit.
Projektligji sjell edhe një tjetër ndryshim të rëndësishëm për bizneset: në çdo shpallje për një vend të lirë pune do të duhet të publikohet intervali i pagës për pozicionin. Relacioni shpjegues thekson se ky detyrim vendoset për herë të parë, me synimin për të rritur transparencën në rekrutim.
Ndryshimet krijojnë gjithashtu “Pasaportën Digjitale të Punësimit dhe Aftësive”, një dokument elektronik ku do të pasqyrohen marrëdhëniet e punës, periudhat e punësimit, profesionet, kualifikimet dhe eksperienca profesionale e çdo individi. Sistemi do të lidhet me bazat shtetërore të të dhënave dhe synon të shmangë kërkesat e përsëritura për dokumente fizike.
Rregulla të reja vendosen edhe për punëkërkuesit e regjistruar. Refuzimi pa arsye i një oferte pune të konsideruar të përshtatshme, refuzimi i pjesëmarrjes në masa aktivizimi apo deklarimi i rremë mund të çojë në pezullimin ose heqjen e statusit të punëkërkuesit.
Për të përcaktuar nëse një punë është “e përshtatshme”, do të merren parasysh kualifikimet, eksperienca e mëparshme, gjendja shëndetësore, vendbanimi, mundësia e lëvizjes dhe, kur është rasti, detyrimet familjare ose të kujdestarisë.
Projektligji parashikon gjithashtu krijimin e Observatorit të Tregut të Punës dhe Aftësive, ku do të mblidhen dhe analizohen të dhëna mbi kërkesën për punë, profesionet në zhvillim dhe mungesat e aftësive në treg.
Ndryshimet janë ende në fazën e projektligjit dhe pritet të ndryshojnë ndjeshëm mënyrën se si bizneset raportojnë vendet e lira të punës, punësimet dhe largimet e punonjësve.
