Ministri i Financave, Petrit Malaj, mori pjesë në aktivitetin e nivelit të lartë “Turizmi i Qëndrueshëm për Punësim, Jetesë dhe Zhvillim”, zhvilluar në kuadër të Takimeve Vjetore 2025 të Grupit të Bankës Botërore dhe Fondit Monetar Ndërkombëtar, që u mbajt në Uashington të Shteteve të Bashkuara të Amerikës.
Në këtë aktivitet morën pjesë ministra financash nga vende të ndryshme, politikëbërës dhe drejtues ndërkombëtarë, të cilët diskutuan mbi mënyrat se si turizmi, sidomos ai kulturor dhe natyror, mund të shndërrohet në motor për punësim, fuqizim komunitar dhe rritje të qëndrueshme ekonomike.
Gjatë diskutimit në panel me drejtoreshën e përkohshme globale për Mjedisin në Bankën Botërore, Genevieve Connors, ministri Malaj prezantoi transformimin e Shqipërisë turistike gjatë viteve të fundit, duke e cilësuar atë si një ndër destinacionet më dinamike të Mesdheut.
“Objektivi ynë është të transformojmë Shqipërinë në një destinacion me vlerë të lartë, gjatë gjithë vitit, që ndërthur bukuritë natyrore me infrastrukturën cilësore, autenticitetin kulturor dhe zhvillimin e gjelbër. Deri në vitin 2030 ne parashikojmë të gjenerojmë 6,6 miliardë euro të ardhura vjetore nga turizmi, duke dyfishuar qëndrimet dhe duke reflektuar, si rritjen e cilësisë së shërbimeve, ashtu edhe njohjen ndërkombëtare të Shqipërisë si një destinacion elitar turistik”, theksoi ministri Malaj.
Ai shtoi se kjo ambicie do të mbështetet nga investime të qëndrueshme në infrastrukturë, digjitalizim dhe aftësimin e fuqisë punëtore, për të garantuar një rritje gjithëpërfshirëse, të gjelbër dhe të integruar me strategjinë kombëtare të zhvillimit.
Malaj nënvizoi gjithashtu rëndësinë e partneriteteve ndërkombëtare, veçanërisht me Bankën Botërore, që mbështet reformat strukturore dhe ekonomike të Shqipërisë.
“Në vitin 2014, Shqipëria kishte jo më shumë se 3,6 milionë vizitorë të huaj, ndërsa në vitin 2024 ky numër arriti në rreth 12 milionë. Janë shifra që kanë ndikuar drejtpërdrejt në rritjen e konsumit, punësimit dhe në forcimin e ekonomisë kombëtare”, u shpreh ministri.
Në përfundim të fjalës së tij, ministri Malaj theksoi se turizmi do të vijojë të mbetet një shtyllë e rëndësishme e ekonomisë shqiptare, ndërsa vizioni “Shqipëria 2030” synon ta pozicionojë vendin si një lider të turizmit të qëndrueshëm në Mesdhe. /skyweb.al
