Banka e Shqipërisë vlerëson se konflikti në Lindjen e Mesme pritet të ketë një ndikim të moderuar dhe afatshkurtër në ekonominë shqiptare, kryesisht përmes rritjes së çmimeve dhe inflacionit, por pa pasoja afatgjata për zhvillimin ekonomik të vendit.
Drejtori i Politikës Monetare në Bankën e Shqipërisë, Erald Themeli, deklaroi se ekonomia shqiptare po përballet me këtë situatë nga pozita më të forta krahasuar me goditjet e mëparshme, si pandemia dhe lufta në Ukrainë.
Sipas tij, ekonomia ka vijuar trendin pozitiv të zhvillimit, i reflektuar në rritjen ekonomike, zgjerimin e punësimit në sektorin privat jobujqësor dhe rritjen e pagave.
“Ndikimi në ekonominë shqiptare do të jetë i moderuar, në terma të rritjes së çmimeve dhe inflacionit, por ajo që është më e rëndësishme është që do të jetë kalimtar, pra nuk do të lërë gjurmë afatgjata në trendet e zhvillimit të vendit, me impakte minimale ose margjinale në treguesit e aktivitetit ekonomik”, u shpreh Themeli.
Sipas projeksioneve të Bankës së Shqipërisë, inflacioni mund të kalojë objektivin prej 3% gjatë gjysmës së dytë të vitit 2026 dhe në fillim të vitit 2027, por niveli i rritjes pritet të mbetet i kontrolluar dhe më i ulët krahasuar me periudhën pas nisjes së luftës në Ukrainë.
“Projeksionet tona për të ardhmen sugjerojnë që trendi i inflacionit do të vijojë të ketë një rritje gjatë gjysmës së dytë të vitit 2026 dhe ndoshta edhe në gjysmën e parë të vitit 2027, rritje e cila pritet ta sjellë këtë tregues diçka mbi objektivin prej 3% të Bankës së Shqipërisë, por gjithsesi një rritje e cila do të jetë mjaft më e kufizuar dhe më e reduktuar në raport me atë ecuri të inflacionit që ne patëm pas krizës në Ukrainë”, deklaroi ai.
Banka e Shqipërisë vlerëson se, ndonëse tensionet në Lindjen e Mesme mund të transmetojnë efekte te çmimet e energjisë dhe kostot e importit, ekonomia shqiptare aktualisht paraqitet më rezistente ndaj goditjeve të jashtme sesa në vitet e fundit. /skyweb.al
