Dy Tigrat e ankoruar në Vlorë do të konvertohen që të prodhojnë energji me gaz.
Qeveria ka gjetur zgjidhjen për të shpëtuar nga një prej kontratave më kontroverse publike, atë të marrjes me qira të dy anijeve për prodhim energjie, të cilat u sollën në Shqipëri nga Bangladeshi.
Në programin qeverisës për periudhën 2025-2029, qeveria thekson se konvertimi i TEC-eve lundruese të ankoruara në Triport nga nafta në gaz do të ulë koston e prodhimit të tyre duke i bërë më rentabël. Synimi është që anijet të furnizohen nga gazi përmes gazsjellësit TAP.
Dy termocentralet lundruese u kontraktuan nga qeveria shqiptare në shtator të vitit 2022. Sipas kontratës të lidhur mes KESH dhe kompanisë amerikane Excelerate, Korporata u paguan 94.5 mijë euro në ditë si qira dhe kosto mirëmbajtje, ndërkohë që siguron dhe karburantin për prodhimin e energjisë vet.
Kostoja e prodhimit të energjisë nga dy anijet rezulton disa herë më e lartë se çmimi i blerjes së saj në bursë, çka e ka bërë këtë një nga prokurimet me të diskutueshme në publik.
Për pothuajse dy vjet anijet qëndruan të ankoruara pa prodhuar fare energji. Ato nisën të prodhojnë pjesërisht në fillim të vitit të kaluar, ndërkohë që gjatë këtij viti mendohet se kanë prodhuar më shumë, mbi 80 mijë megavat energji. Ndërkohë që mbetet e paqartë se sa para ka paguar në total deri më tani KESH, për dy anijet.
Konvertimi në gaz duket një tjetër zgjidhje e sforcuar, pasi qeveria shqiptare është e detyruar të gjejë një zgjidhje për dy anijet e Vlorës.
Në kontratën e qirasë të vitit 2022, parashikohej që në fillim se pas pagesës së dy viteve të qirasë, dy anijet mbeteshin në pronësi të Korporatës Elektroenergjetike Shqiptare. /kapitali.al
