Numri i turistëve europianë që vizitojnë Shtetet e Bashkuara ka pësuar një rënie të ndjeshme pas rikthimit të Donald Trump në krye të Shtëpisë së Bardhë. Sipas të dhënave nga Administrata Ndërkombëtare e Tregtisë (ITA), numri i udhëtarëve nga Europa Perëndimore që kanë kaluar të paktën një natë në SHBA ka rënë me 17 për qind në mars, krahasuar me të njëjtin muaj të një viti më parë.
Rënia është edhe më e ndjeshme në disa vende si Irlanda, Norvegjia dhe Gjermania, ku numri i turistëve drejt SHBA-ve ka rënë me më shumë se 20 për qind.
Kjo prirje përbën një kërcënim serioz për industrinë amerikane të turizmit, e cila gjeneron afro 2.9 trilionë dollarë aktivitet ekonomik çdo vit. Ekspertët paralajmërojnë se një rënie e tillë mund të ketë pasoja të mëdha në punësim dhe në të ardhurat nga turizmi, veçanërisht në zonat më të varura nga vizitorët ndërkombëtarë.
Sektori i udhëtimeve në SHBA po përballet me një sërë sfidash, përfshirë tarifat doganore të vendosura nga presidenti, të cilat kanë shtuar frikën për një ngadalësim ekonomik. Gjithashtu, tarifat dhe politika ekonomike e administratës Trump pritet të dëmtojnë konkurrueshmërinë e ekonomisë amerikane në një kohë kur dollari është i fortë. /skyweb.al
