Shërbimi Sekret i Shteteve të Bashkuara ka zbuluar një vend të dyshimtë me vijë të qartë shikimi drejt pistës së aeroportit ndërkombëtar të Palm Beach, ku ish-Presidenti Donald Trump zakonisht zbret nga avioni presidencial Air Force One. Lajmi u konfirmua nga zyrtarë amerikanë për “Fox News”.
Zbulimi u bë të enjten gjatë përgatitjeve të avancuara të sigurisë, përpara mbërritjes së Trump në Palm Beach. Sipas Drejtorit të FBI-së, Kash Patel, vendi i identifikuar dukej si një strukturë e ngritur me qëllime të paqarta, e cila ndodhej brenda fushëpamjes së drejtpërdrejtë të zonës së uljes së avionit presidencial. Ai theksoi se deri më tani nuk është identifikuar ndonjë person i përfshirë.
“Pas kontrollit paraprak, FBI mori drejtimin e hetimit. Aktualisht po analizojmë provat nga vendi i ngjarjes dhe po përdorim kapacitetet tona të analizës së të dhënave nga pajisjet celulare,” tha Patel.
Zëdhënësi i Shërbimit Sekret, Anthony Guglielmi, konfirmoi gjithashtu bashkëpunimin e ngushtë mes agjencisë, FBI-së dhe autoriteteve lokale të zbatimit të ligjit në Qarkun Palm Beach. Ai theksoi se nuk pati asnjë ndërprerje në lëvizjet presidenciale dhe se asnjë person nuk u gjet në vendin e dyshimtë.
“Ndërsa nuk mund të ndajmë detaje specifike për objektet e zbuluara apo qëllimin e tyre, ky incident tregon rëndësinë e masave tona të shumëfishta të sigurisë,” u shpreh Guglielmi.
Sipas një burimi të zbatimit të ligjit, duket se platforma ishte ndërtuar disa muaj më parë. Hetimi po zhvillohet vetëm pak kohë pas një rasti tjetër shqetësues: Ryan Routh u shpall fajtor për përpjekje për vrasjen e Trump, pasi kishte ndërtuar një fole snajperi në një zonë me shkurre pranë një fushe golfi në Palm Beach. /Skyweb.al
