Autoriteti Italian për Mbrojtjen e të Dhënave Personale ka gjobitur kompaninë Meta me 805 milionë euro për aksesimin e fotografive dhe videove të përdoruesve të Android-it pa marrë pëlqimin e tyre të qartë.
Sipas autoritetit italian, rreth 20 milionë përdorues të telefonave inteligjentë nuk janë informuar siç duhet se Facebook kishte akses në galerinë e tyre të fotografive dhe videove përmes një funksioni të aplikacionit.
Funksioni në fjalë sugjeronte fotografi dhe video nga galeria e telefonit si ide për publikime në Facebook. Megjithatë, përdoruesit kishin dhënë vetëm një autorizim të përgjithshëm për aksesin në galeri, pa u informuar qartë se fotografitë mund të përdoreshin edhe për krijimin e sugjerimeve për postime.
Autoriteti italian i ka dhënë Meta-s 60 ditë kohë për ta çaktivizuar këtë funksion si parazgjedhje dhe për të kërkuar pëlqimin e përdoruesve në mënyrë të veçantë.
Gjobëvënia konsiderohet ndër më të lartat që një autoritet italian ka vendosur ndonjëherë ndaj një kompanie teknologjike.
Një zëdhënës i Meta-s deklaroi për BBC se kompania nuk pajtohet me vendimin dhe planifikon ta apelojë atë.
Autoriteti italian bëri të ditur se në përcaktimin e gjobës mori parasysh numrin e lartë të personave të prekur, si dhe faktin se funksioni vazhdonte të ishte aktiv për përdoruesit që nuk kishin përditësuar aplikacionin, por edhe për ata që kishin dhënë më parë pëlqimin për këtë sistem.
Meta është kompania mëmë e Facebook, Instagram dhe WhatsApp. /skyweb.al
