Autoritetet ajrore në Brazil kanë mbyllur përgjithmonë kompaninë ajrore Voepass Airlines, më pak se një vit pas aksidentit tragjik të fluturimit 2283, që mori jetën e 62 personave në gusht 2024.
Më 24 qershor 2025, Agjencia Kombëtare e Aviacionit Civil (ANAC) i hoqi kompanisë Certifikatën e Operatorit Ajror, duke përmendur “shkelje të përsëritura të sigurisë” dhe “dështime sistematike”.
Mbyllja nuk u shkaktua vetëm nga aksidenti, por nga mungesa e veprimeve pas tij. Hetimet zbuluan se Voepass pengoi kryerjen e të paktën 20 inspektimeve të detyrueshme që prej aksidentit, duke treguar një neglizhencë të thellë ndaj standardeve bazë të sigurisë ajrore.
Fluturimi 2283, një ATR 72-500, u rrëzua në mënyrë dramatike pasi për shkaqe ende të pazbardhura u fut në një cikël rrotullimesh të pakontrolluara në lartësi të ulët.
Raporti paraprak nga autoriteti hetimor brazilian CENIPA nuk gjeti shenja stresi te ekuipazhi përpara momentit kritik, ndërsa shkaku i hyrjes në këtë gjendje aerodinamike fatale mbetet i paqartë. Ajo që u bë edhe më e rëndë, sipas ANAC, ishte mungesa e reagimit: asnjë përmirësim teknik, asnjë reformë në protokollet e sigurisë dhe asnjë transparencë përballë publikut apo rregullatorëve.
Pas këtyre dështimeve, ANAC e konsideroi kompaninë të paaftë për të operuar dhe mori vendimin e prerë për t’i hequr licencën. /skyweb.al
