Qeveria miratoi rregullat e reja për zhvillimin e programit “Pas shkolle” në institucionet publike të arsimit parauniversitar. Programi do të zhvillohet jashtë orarit të detyrueshëm mësimor dhe synon përforcimin e njohurive, por edhe zhvillimin e aftësive sociale, sportive, kulturore, artistike dhe krijuese të nxënësve.
Mësuesit dhe trajnuesit që do të angazhohen do të paguhen 1 mijë lekë për çdo orë të realizuar pas mësimit.
Pagesa do të trajtohet si shpërblim për një shërbim të veçantë arsimor dhe nuk do të përfshihet në pagën mujore të mësuesit. Angazhimi nuk ndryshon as ngarkesën e tij të detyrueshme mësimore.
Në program mund të përfshihen mësuesit që janë aktualisht të punësuar në shkollat publike, me kontratë të përhershme ose të përkohshme. Mundësi angazhimi do të kenë edhe kandidatët që kanë kaluar provimin në portalin “Mësues për Shqipërinë” dhe ndodhen në listën e pritjes për një vend pune.
Programi është i hapur gjithashtu për ish-mësuesit që kanë dalë në pension, si edhe për personat e diplomuar në mësuesi ose në fusha të përafërta.
Për aktivitetet artistike dhe kulturore mund të angazhohen mësues të profileve artistike, persona të diplomuar në arte, ish-mësues të këtyre profileve dhe profesionistë që kanë punuar në institucione kulturore.
Pjesë e programit mund të bëhen edhe artizanët e regjistruar si bartës të folklorit ose të vlerave të trashëgimisë kulturore jomateriale.
Agjencia Kombëtare e Arsimit Parauniversitar do të publikojë thirrjen për aplikim, ndërsa kandidatët do të kenë një afat prej 10 ditësh për të paraqitur kërkesën.
Mësuesit që janë aktualisht të punësuar do të aplikojnë përmes Sistemit të Menaxhimit të Informacionit Parauniversitar, SMIP.
Kandidatët në listën e pritjes do të aplikojnë përmes shërbimit elektronik “Mësues për Shqipërinë” në portalin e-Albania.
Pensionistët, të diplomuarit, artistët dhe artizanët do ta dorëzojnë dosjen pranë zyrës vendore të arsimit parauniversitar ku ndodhet shkolla.
Mësuesit që punojnë në shkollën ku do të zhvillohet programi do të kenë përparësi në përzgjedhje.
Vlerësimi i tyre do të bëhet nga një komision me tre anëtarë: drejtori i shkollës, një mësues i zgjedhur nga këshilli i mësuesve dhe kryetari i këshillit të prindërve.
Kur nuk ka kandidatë nga shkolla, vendet mund të plotësohen me mësues nga portali ose me aplikantë të kategorive të tjera.
Pas përzgjedhjes, trajnuesi do të lidhë një kontratë shërbimi me institucionin arsimor, ndërsa financimi do të mbulohet nga fondi buxhetor i miratuar çdo vit për programin “Pas shkolle”. /skyweb.al
