Kryeministri Edi Rama bëri të ditur se Shqipëria hodhi një hap të ri në drejtim të rritjes së kapaciteteve ushtarake dhe ripozicionimit në industrinë mbrojtëse.
Në rubrikën “Shënimet e Javës”, Rama u shpreh nga Berlini se një nga momentet më të rëndësishme ishte nënshkrimi i marrëveshjes mes kompanisë italiane Fincantieri dhe kompanisë publike shqiptare KAYO.
Sipas tij, kjo nismë shënoi rikthimin e Shqipërisë në hartën e industrisë ushtarake dhe bashkëpunimit me partnerët ndërkombëtarë, pas dekadash mungese në këtë sektor.
“Një tjetër moment i rëndësishëm i javës ishte hapja e një rruge tjetër në drejtim të rritjes së kapaciteteve tona ushtarake dhe të ripozicionimit të Shqipërisë në rrjetin e industrisë ushtarake, ku deri para pak kohësh ishim prej dekadash krejt inekzistent.
Firmosëm marrëveshjen mes kompanisë italiane Fincantieri, një nga emrat e mëdhenj të ekselencës industriale europiane dhe kompanisë sonë publike Kayo për prodhimin e mjeteve detare në Shqipëri në kantierin e Pashalimanit, qoftë në funksion të forcave të armatosura të Republikës së Shqipërisë, qoftë edhe për forcat aleate”, u shpreh Rama.
Kryeministri theksoi se projekti nuk përbëri vetëm një investim të konsiderueshëm, por krijoi edhe një front të ri punësimi. Sipas tij, në fazën e parë u parashikuan rreth 400 vende të reja pune të mirëpaguara.
Ai shtoi se iniciativa krijoi një perspektivë konkrete për të rinjtë, duke përfshirë nxënësit e shkollës profesionale industriale të Vlorës, të cilët do të ftoheshin të bëheshin pjesë e programeve të trajnimit për t’u punësuar në kompaninë e përbashkët që lindi nga kjo marrëveshje, e cila pritet të operojë me emrin “Fincantieri Albania”. /skyweb.al
