Nga shishet e vogla të shampos në hotele te kutitë plastike të ushqimit në restorante, një sërë ambalazhesh njëpërdorimëshe pritet të kufizohen në Shqipëri. Ministria e Mjedisit ka përgatitur një projektvendim që parashikon ndryshime në paketimin dhe shërbimin e produkteve, me afate nga viti 2028 deri në vitin 2030.
Pjesa më e madhe e kufizimeve është parashikuar të nisë më 1 janar 2030. Baret dhe restorantet do të duhet të reduktojnë përdorimin e gotave, pjatave, tabakave dhe kutive plastike njëpërdorimëshe për produktet që konsumohen në ambientet e tyre, përfshirë tavolinat në hapësirat e jashtme.
Rregullat prekin edhe paketimet plastike të porcioneve të vogla të sheqerit, salcave, erëzave dhe kremit të kafesë. Projektvendimi parashikon përjashtime, ndër të tjera, për disa produkte që shoqërojnë ushqimet me vete dhe për nevoja të veçanta higjienike apo mjekësore.
Në hoteleri, kufizimet do të përfshijnë ambalazhet njëpërdorimëshe të produkteve të higjienës, si shampot, locionet dhe sapunët e paketuar për një qëndrim të vetëm.
Ndërsa supermarketet do të përballen me kufizime për paketimin plastik të frutave dhe perimeve të freskëta në sasi nën 1.5 kilogramë. Edhe këtu parashikohen përjashtime për ruajtjen e freskisë, higjienën dhe mbrojtjen nga dëmtimi.
Përpara këtyre masave, projektvendimi synon të ndryshojë mënyrën e shitjes së ushqimeve dhe pijeve me vete. Nga 12 shkurti 2028, bizneset e shërbimit ushqimor, me përjashtim të mikrondërmarrjeve, duhet të ofrojnë alternativa në ambalazhe të ripërdorshme, brenda një sistemi ripërdorimi. Kjo zgjedhje nuk duhet ta bëjë produktin më të shtrenjtë.
Nga 12 shkurti 2029, klientët do të mund të përdorin edhe gotën e tyre për të marrë kafe apo pije të tjera. Lokalet duhet ta pranojnë atë nëse plotëson kushtet higjienike, pa aplikuar çmim më të lartë. Bizneset mund të ofrojnë edhe ulje apo bonuse për këtë praktikë.
Projektvendimi përfshin gjithashtu kërkesa për kompostueshmërinë e qeseve të çajit, disa ambalazheve njëporcionëshe të kafesë dhe etiketave ngjitëse të frutave e perimeve.
Nisma synon përafrimin me rregullat e Bashkimit Europian për mbetjet e ambalazheve. Masat janë ende propozime dhe zbatimi i tyre do të varet nga miratimi i aktit përfundimtar.
