Turistët polakë kanë tashmë një mundësi të re udhëtimi: treni i parë ndërkombëtar Adriatic Express është nisur zyrtarisht nga Varshava, Poloni, me destinacion qytetin bregdetar kroat Rijeka, në brigjet e Adriatikut.
Treni u nis të premten në orën 13:44 me orën lokale dhe do të përshkojë një udhëtim prej 1240 kilometrash përmes gjashtë shteteve, duke mbërritur në destinacion të shtunën në mëngjes në orën 10:03.
Shërbimi i ri ofrohet nga PKP Intercity, hekurudha shtetërore e Polonisë, e cila njofton se kërkesa ka qenë e lartë: Mbi 90% e vendeve janë shitur, ndërsa të gjitha vendet me shtretër (couchette) janë të rezervuara.
Adriatic Express ofron gjithsej 172 vende, përfshirë 132 vende në klasën e dytë dhe 40 vende me shtretër (rreth 70 euro për person), të pajisura me jastëkë, batanije dhe çarçafë.
Udhëtimi dhe stacionet
Treni do të qarkullojë katër herë në javë gjatë verës, duke kaluar nëpër Çeki, Austri dhe Slloveni përpara se të arrijë në Kroaci.
Shërbimet e restorantit dhe barit do të jenë në dispozicion gjatë pjesës nga Varshava në Vjenë, duke ofruar ushqime të ngrohta, të ftohta dhe pije.
Adriatic Express ndalon shkurtimisht në stacione të rëndësishme në Poloni si Katowice, Rybnik dhe Wodzisław Śląski, ndërsa udhëtarët nga qytete si Krakova, Łódź, Poznani dhe Wrocławi mund të bashkohen përmes lidhjeve me trena të tjerë të PKP-së.
Pasi mbërrin në Vjenë, një pjesë e vagonëve të trenit ndahen për të formuar linja të tjera ndërkombëtare, ndërsa vagonët që vazhdojnë drejt Rijekës bashkohen me trenin e natës “Istria” që vjen nga Budapesti.
Gjatë natës, treni kalon në Ljubljanë, dhe ndalet në destinacione turistike si Postojna dhe Opatija, për të mbërritur në Rijeka në orët e para të mëngjesit.
Shërbimi do të zgjasë deri në fund të sezonit veror, me nisjen e fundit nga Varshava më 28 gusht dhe nga Rijeka më 29 gusht.
Ky tren është jo vetëm një alternativë e re komode për pushuesit, por edhe një mënyrë për të përjetuar udhëtimin klasik europian me pamje panoramike, ndalesa kulturore dhe shërbime moderne përgjatë rrugës për në det./skyweb.al
