Me hyrjen në fuqi të Udhëzimit të Ministrisë së Financave ka nisur zbatimi i Ligjit nr. 86/2025 për faljen dhe lehtësimin e detyrimeve tatimore dhe tarifave vendore.
Bashkia e Tiranës, nëpërmjet Drejtorisë së Përgjithshme të Taksave dhe Tarifave Vendore, njofton qytetarët dhe subjektet tregtare debitore se mund të përfitojnë nga fshirja e plotë ose e pjesshme e detyrimeve vendore, si edhe nga falja e gjobave dhe kamatëvonesave, në varësi të periudhës kur janë krijuar këto detyrime.
Sipas ligjit, detyrimet e krijuara deri më 31 dhjetor 2014 fshihen automatikisht dhe plotësisht, pa qenë nevoja për pagesë apo aplikim nga ana e taksapaguesit.
Për detyrimet e periudhës 1 janar 2015 – 31 dhjetor 2019 parashikohen dy mundësi përfitimi:
-pagesa e 50% të principalit deri më 30 qershor 2026, duke përfituar faljen e pjesës tjetër;
-ose pagesa e 75% të principalit deri më 31 dhjetor 2026, me faljen e shumës së mbetur.
Në të dyja rastet falen tërësisht gjobat dhe kamatëvonesat.
Gjithashtu, në rastet kur principali është shlyer më parë dhe kanë mbetur vetëm gjoba apo kamatëvonesa, edhe këto detyrime do të falen.
Për detyrimet e krijuara gjatë periudhës 1 janar 2020 – 31 dhjetor 2024 kërkohet pagesa e plotë e principalit deri më 31 dhjetor 2026. Pas pagesës, do të falen të gjitha gjobat dhe kamatëvonesat përkatëse.
Drejtoria e Përgjithshme e Taksave dhe Tarifave Vendore u bën thirrje qytetarëve dhe bizneseve që, gjatë kryerjes së pagesave, të specifikojnë në përshkrim se pagesa po kryhet në bazë të ligjit të faljes.
Nga përfitimet e këtij ligji përjashtohen subjektet që janë dënuar me vendim gjyqësor të formës së prerë, si edhe ato që ndodhen në proces gjyqësor ose hetim penal për vepra penale në fushën tatimore apo doganore.
