Tatimpaguesit që nuk shlyejnë detyrimet e tyre ndaj shtetit rrezikojnë të mbeten pa makina. Administrata Tatimore ka firmosur një marrëveshje me Drejtorinë e Përgjithshme të Shërbimeve të Transportit Rrugor, që i jep akses në kohë reale mbi të dhënat e mjeteve në pronësi të tatimpaguesve.
Nëpërmjet kësaj marrëveshjeje, Administrata Tatimore do të mund të identifikojë menjëherë automjetet e personave që kanë detyrime të papaguara dhe, në rast mosshlyerjeje brenda afateve ligjore, do të aplikojë masat e sigurimit dhe procedurat e mbledhjes me forcë mbi to.
Tatimet i bëjnë thirrje të gjithë subjekteve që të përmbushin vullnetarisht detyrimet e tyre dhe të mos përpiqen të tjetërsojnë pasuritë për të shmangur ekzekutimin e tyre. Në veçanti, theksohet se çdo shitje apo dhurim i automjeteve me qëllim shmangien e detyrimeve ndaj shtetit do të konsiderohet i pavlefshëm dhe do të pasohet me sanksione ligjore.
Ndërkohë, një aksion i veçantë është nisur nga Drejtoria e Kontrollit të Specializuar për verifikimin e pronësisë së makinave luksoze të blera nga persona që nuk rezultojnë të regjistruar si tatimpagues aktivë. Të dhënat e siguruara nga Drejtoria e Transportit Rrugor tregojnë se rreth 400 automjete të nivelit të lartë janë blerë gjatë viteve 2023–2024 nga individë që nuk kanë asnjë të ardhur të deklaruar.
Administrata Tatimore paralajmëron se të gjithë individët që kanë në pronësi mjete të kësaj kategorie do t’u nënshtrohen një procesi të plotë verifikimi përmes analizës së të ardhurave të deklaruara, krahasimit me vlerën e automjetit, si dhe kërkesës për dokumentacion justifikues për burimin e fondeve. Në rast mospërputhjeje, do të ndërmerren masat përkatëse administrative dhe penale./skyweb.al
