Përplasja mes palëve të përfshira në projektin e Aeroportit Ndërkombëtar të Vlorës është thelluar më tej, pasi kompania zvicerane MABCO Constructions S.A., e cila deklaron se zotëron 98% të kuotave të “Vlora International Airport – VIA” sh.p.k., tha se punonjësit dhe specialistët e saj të huaj nuk janë lejuar të futen në kantier gjatë ditës së sotme.
Në një reagim publik, MABCO deklaroi se hyrja e stafit të saj është penguar nga roje private, ndërsa e cilësoi situatën si një tentativë për të marrë kontrollin praktik të projektit.
Sipas kompanisë, situata në hyrje të kantierit ka qenë e tensionuar dhe kërkon ndërhyrjen e institucioneve ligjzbatuese për të shmangur përshkallëzimin.
MABCO deklaron se projekti ndodhet në një fazë të avancuar, ku sipas saj janë realizuar pjesa më e madhe e punimeve kryesore, përfshirë ndërtimin e terminalit, organizimin e kontratave dhe vendosjen e infrastrukturës bazë për fazën finale të aeroportit.
Shoqëria zvicerane kërkon që t’i garantohet akses në kantier, duke respektuar procedurat e sigurisë dhe rregullat teknike të projektit.
Nga ana tjetër, “Vlora International Airport – VIA” ka deklaruar më herët se ka ndërprerë kontratën me MABCO-n në cilësinë e nënkontraktorit, me argumentin se kompania kishte vonuar punimet dhe nuk kishte përmbushur detyrimet kontraktuale.
Sipas VIA, deri më 8 prill 2026 janë evidentuar 429 ditë vonesë në realizimin e projektit, ndërsa dëmvonesat e përllogaritura arrijnë në 4.29 milionë euro.
Po sipas VIA, procedurat e hyrjes në kantier janë standarde sigurie dhe zbatohen për të gjithë subjektet pa përjashtim.
Pikërisht mbi këtë bazë, gjatë ditës së sotme punonjësit e MABCO-s nuk janë lejuar të futen në kantierin e aeroportit, me argumentin se kompania kishte shkelur kontratën dhe kishte tejkaluar afatet e punimeve./skyweb.al
