Të dhënat e muajve të parë të vitit po japin sinjale shumë premtuese për një sezon turistik të suksesshëm gjatë verës në Shqipëri.
Rritja e numrit të vizitorëve, sidomos e turistëve të huaj, që në periudha jashtë sezonit tradicional veror, po shihet si tregues i zgjerimit të interesit për vendin dhe i një sezoni që pritet të jetë më i gjatë dhe më intensiv se vitet e kaluara.
Turizmi në Shqipëri vijon të japë sinjale rritjeje edhe jashtë sezonit veror.
Gjatë muajit mars, numri i vizitorëve që u akomoduan në strukturat akomoduese në vend u rrit me 20.8% krahasuar me të njëjtën periudhë të një viti më parë, duke treguar se interesi për Shqipërinë si destinacion po zgjerohet gjithnjë e më shumë, sidomos nga turistët e huaj.
Sipas të dhënave, vizitorët jorezidentë ishin ata që udhëhoqën rritjen gjatë këtij muaji, me një zgjerim prej 23.7%, ndërsa turistët rezidentë shënuan një rritje prej 15.9%.
Ky ndryshim vjen pas dy muajve të parë të vitit, ku ritmin më të lartë të rritjes e kishin mbajtur vizitorët rezidentë.
Të dhënat tregojnë se Shqipëria po tërheq gjithnjë e më shumë vëmendjen e turistëve të huaj edhe në periudha që tradicionalisht konsideroheshin më të qeta për sektorin.
Edhe net-qëndrimet në strukturat akomoduese kanë vijuar trendin pozitiv, duke u rritur me 12.8% në krahasim me marsin e vitit të kaluar.
Vizitorët rezidentë regjistruan një rritje prej 9.8% të net-qëndrimeve, ndërsa turistët jorezidentë shënuan një zgjerim edhe më të fortë, me 14.4%.
Kjo tregon se jo vetëm numri i turistëve po rritet, por edhe kohëzgjatja e qëndrimit të tyre në vend.
Rajoni qendror mbetet destinacioni më i preferuar për turistët, duke regjistruar rreth 62 mijë vizitorë në strukturat akomoduese. Ndërkohë, rajoni verior renditet i dyti me afro 31 mijë vizitorë, ndërsa rajoni jugor regjistroi rreth 16 mijë vizitorë.
Në total, gjatë muajit mars u regjistruan afërsisht 108 mijë vizitorë në hotele dhe struktura të tjera akomoduese në të gjithë vendin.
Sa i përket origjinës së turistëve të huaj, italianët vijojnë të dominojnë me 30% të totalit të vizitorëve jorezidentë që u akomoduan në Shqipëri.
Pas tyre renditen Kosova me 12%, Gjermania me 7%, ndërsa vizitorët nga Mbretëria e Bashkuar dhe Franca përbëjnë përkatësisht 6% dhe 5% të totalit. Një pjesë e konsiderueshme, rreth 40%, vjen nga vende të tjera, çka tregon zgjerimin e hartës së turistëve që po zgjedhin Shqipërinë.
Rritja e numrit të vizitorëve është reflektuar edhe në performancën e hoteleve.
Norma e shfrytëzimit të dhomave arriti në 18.5% gjatë muajit mars, nga 18.1% që ishte në të njëjtën periudhë të vitit 2025.
Edhe pse rritja duket modeste, ajo konfirmon trendin pozitiv të industrisë së turizmit dhe zgjerimin gradual të sezonit turistik në vend. /skyweb.al
