Tregjet ndërkombëtare të metaleve të çmuara po përballen me një valë të fortë shitjesh, e cila ka goditur çmimet e arit dhe argjendit. Sipas vlerësimeve që po qarkullojnë në mediat financiare, rreth 400 miliardë dollarë nga vlera e përgjithshme e këtyre dy metaleve janë fshirë në një interval prej vetëm pak minutash.
Rënia ka vijuar edhe këtë të mërkurë, 18 nëntor, duke e çuar çmimin e arit në nivelin më të ulët prej më shumë se një viti.

Sipas Reuters, ari humbi 2.1% të vlerës gjatë tregtimit, duke zbritur në 3,769 dollarë për ons. Në një moment të seancës, çmimi preku 3,757 dollarë, niveli më i ulët që prej shtatorit 2025.
Goditje ka marrë edhe argjendi, çmimi i të cilit ra me 3.4%, duke arritur në 45.79 dollarë për ons, pranë niveleve më të ulëta që prej tetorit të vitit të kaluar.
Ndërkohë, një përllogaritje e shpërndarë fillimisht në rrjetin social X nga llogaria financiare Bull Theory pretendon se afro 400 miliardë dollarë vlerë tregu u zhdukën brenda vetëm 30 minutave gjatë rënies së 16 nëntorit.
Megjithatë, kjo shifër mbetet një vlerësim i pakonfirmuar në mënyrë të pavarur dhe nuk përfaqëson para të tërhequra realisht nga investitorët. Bëhet fjalë për zhvlerësimin e përllogaritur të metaleve si rezultat i uljes së çmimeve ndërkombëtare.
Pas goditjes qëndrojnë kryesisht forcimi i dollarit amerikan dhe pritshmëritë për rritje të mëtejshme të normave të interesit nga Rezerva Federale e SHBA-së.
Dollari është ngjitur pranë nivelit më të lartë të 19 muajve të fundit, ndërsa rritja e interesave të obligacioneve amerikane po i bën investimet në ar më pak tërheqëse.
Ndryshe nga obligacionet, ari dhe argjendi nuk gjenerojnë interesa. Për këtë arsye, kur rriten normat e interesit, një pjesë e investitorëve zhvendosin kapitalin drejt instrumenteve financiare që ofrojnë kthime më të larta.
Sipas Reuters, tregjet po vlerësojnë me rreth 95% probabilitet mundësinë që Rezerva Federale të rrisë normën bazë të interesit me 0.25 pikë përqindjeje në dhjetor.
Zhvillimet e fundit po vënë në provë edhe reputacionin e arit si një prej investimeve më të sigurta në periudha pasigurie ekonomike.
Vëmendja e investitorëve është përqendruar tashmë te publikimi i procesverbalit të mbledhjes së fundit të Rezervës Federale, i cili mund të japë sinjale të reja për drejtimin e politikës monetare amerikane dhe ecurinë e çmimeve të metaleve të çmuara.















