Kryeministri Edi Rama deklaroi se Aeroporti i Vlorës do të hapet, pavarësisht vonesave dhe problemeve të krijuara nga mosmarrëveshjet brenda kompanisë koncesionare.
Gjatë ceremonisë së inaugurimit të linjës direkte Tiranë–Toronto nga TIA, Rama u ndal te nevoja për zgjerimin e sistemit të aviacionit civil në vend, duke theksuar se rritja e numrit të pasagjerëve dhe fluturimeve kërkon më shumë kapacitete aeroportuale.
Sipas tij, Aeroporti i Vlorës mbetet një projekt i rëndësishëm në këtë strategji dhe objektivi për funksionimin e tij nuk ka ndryshuar.
FOTO/ Aeroporti Ndërkombëtar i Tiranës nis fluturimet direkte mes Tiranës dhe Torontos, Kanada
“Duhet të zgjerojmë sistemin tonë të aviacionit civil. Ministria e Infrastrukturës dhe Energjisë ka ndërmarrë hapat e duhur dhe objektivi mbetet i palëvizshëm që Aeroporti i Vlorës, një tjetër aeroport i madh, do të hapet me patjetër dhe nuk do të jetë pre e mosmarrëveshjeve brenda përbrenda kompanisë”, u shpreh Rama.
Kryeministri pranoi se projekti është përballur me problematika të brendshme të kompanisë, por tha se institucionet kanë ndërmarrë veprimet e nevojshme për të mos lejuar që këto mosmarrëveshje të pengojnë hapjen e aeroportit.
Aeroporti i Vlorës është konsideruar nga qeveria si një nga projektet kyçe për zhvillimin e turizmit në jug të vendit dhe për zgjerimin e lidhjeve ajrore të Shqipërisë me tregjet ndërkombëtare.
Deklarata e Ramës vjen në një moment kur trafiku ajror në Shqipëri po rritet me ritme të larta, ndërsa qeveria synon të shtojë kapacitetet për të përballuar fluksin e pasagjerëve në vitet e ardhshme.
Sipas kryeministrit, projeksionet për dekadën e ardhshme tregojnë rritje të numrit të pasagjerëve dhe fluturimeve, ndaj zgjerimi i infrastrukturës aeroportuale shihet si i domosdoshëm.
Në këtë kuadër, Aeroporti i Vlorës pritet të ketë rol të rëndësishëm jo vetëm për qytetin bregdetar, por për gjithë zonën e jugut, ku turizmi është kthyer në një nga sektorët kryesorë të ekonomisë.
