Qeveria ka miratuar lejet për ndërtimin e tre centraleve të reja fotovoltaike në vend, të cilat së bashku do të shtojnë 126 megavat kapacitet të instaluar në prodhimin e energjisë nga burimet diellore.
Sipas vendimeve të miratuara, shoqëria “DEVOLLI SUNPOWER” ka marrë autorizimin për ndërtimin e një centrali fotovoltaik me kapacitet 15 megavat në territorin e Bashkisë Devoll.
Një tjetër leje i është dhënë shoqërisë “ONE SOLAR”, e cila do të ndërtojë një park fotovoltaik me fuqi 11.5 megavat në fshatrat Drizë, Gjergjovinë dhe Cingar i Poshtëm të Bashkisë Gramsh.
Projekti më i madh i miratuar i përket bashkimit të përkohshëm të shoqërive “Blessed Investment” sh.p.k. dhe “Matrix Konstruksion” sh.p.k., të cilat do të ndërtojnë një central fotovoltaik me kapacitet 100 megavat në zonën Sheq-Marinas, në Bashkinë Fier.
Me këto investime, Shqipëria vijon zgjerimin e kapaciteteve të prodhimit të energjisë nga burimet e rinovueshme, duke synuar diversifikimin e burimeve energjetike dhe rritjen e prodhimit vendas të energjisë elektrike.
