Tatimi i paguar nga qytetarët shqiptarë për të ardhurat personale është rritur ndjeshëm gjatë muajve të parë të këtij viti, duke arritur një nga nivelet më të larta të dekadës.
Në periudhën janar-prill, arkëtimet nga tatimi mbi të ardhurat personale arritën në rreth 28.4 miliardë lekë, ose afërsisht 284 milionë euro.
Krahasuar me të njëjtën periudhë të vitit 2025, të ardhurat nga ky zë janë rritur me 1.3 miliardë lekë, ose rreth 13 milionë euro më shumë.
Sipas të dhënave zyrtare, rritja vjetore rezulton në rreth 4.6 për qind, ndërsa në raport me planin, arkëtimet janë tejkaluar me 0.7 për qind. Vetëm gjatë muajit prill, tatimi i mbledhur nga të ardhurat personale arriti në rreth 67 milionë euro, duke konfirmuar vijimin e ecurisë pozitive mujore.
Tatimi mbi të ardhurat personale përfshin kryesisht të ardhurat nga pagat, por edhe të ardhura të tjera të individëve, si qiratë afatgjata, të ardhurat nga platformat e akomodimit si Airbnb dhe Booking, si edhe interesat bankare.
Të dhënat tregojnë se në një dekadë ky zë i buxhetit është rritur me ritme të forta. Në periudhën janar-prill 2016, arkëtimet nga tatimi mbi të ardhurat personale ishin rreth 8.7 miliardë lekë. Në të njëjtën periudhë të vitit 2026, ato arritën në afro 28.4 miliardë lekë.
Kjo do të thotë se brenda dhjetë viteve, qytetarët shqiptarë paguajnë rreth 19.7 miliardë lekë më shumë, ose afërsisht 197 milionë euro shtesë, nga të ardhurat personale. Rritja në këtë periudhë llogaritet në rreth 226.4 për qind.
Sipas administratës tatimore, zgjerimi i arkëtimeve lidhet me përmirësimin e formalizimit në ekonomi dhe rritjen e deklarimit të të ardhurave. Fushatat kundër informalitetit, veçanërisht ato që kanë synuar nën-deklarimin e pagave gjatë vitit 2025 dhe në vijim, kanë ndikuar në ndryshimin e sjelljes së bizneseve.
Ndikim të rëndësishëm ka pasur edhe vendosja e pagave referencë në sektorë ku informaliteti ka qenë më i lartë, si turizmi, ndërtimi dhe shëndetësia. Kjo ka sjellë rritje të pagave të deklaruara dhe, për rrjedhojë, edhe më shumë detyrime tatimore të paguara në buxhet.
Në të njëjtën linjë kanë ndikuar rritjet e pagave në administratën publike gjatë dy viteve të fundit, të cilat janë ndjekur edhe nga sektori privat, si dhe rritja e pagës minimale në 50 mijë lekë.
Një tjetër burim i rëndësishëm është zgjerimi i tregut të qirave, sidomos atyre afatshkurtra të lidhura me turizmin. Shtimi i pronave të listuara në platformat online ka rritur të ardhurat e individëve dhe njëkohësisht edhe nivelin e tatimit të paguar prej tyre.
Rritja e tatimit mbi të ardhurat personale tregon një bazë më të gjerë tatimore, më shumë paga të deklaruara dhe më shumë të ardhura të formalizuara.
Por njëkohësisht ajo tregon edhe barrën më të madhe fiskale që qytetarët po mbajnë në buxhet, në një periudhë kur pagat, qiratë dhe aktiviteti ekonomik janë zgjeruar ndjeshëm.
