Banka Qendrore e Holandës ka zhvendosur 86 tonë ar nga rezervat e saj të mbajtura në Shtetet e Bashkuara dhe Kanada drejt Londrës, duke përmendur rritjen e pasigurive gjeopolitike.
Sipas De Nederlandsche Bank, rezervat e arit të vendosura në Londër mund të tregtohen më lehtë se ato që mbahen në Nju Jork dhe Otava, duke i bërë më të përdorshme në rast krize.
Presidenti i bankës, Olaf Sleijpen, tha se institucioni nuk pret të ketë nevojë të përdorë rezervat, por synon të forcojë gatishmërinë dhe rezistencën financiare të vendit.
Holanda dispononte në fund të vitit 2025 rreth 612.4 tonë ar, me një vlerë prej afro 72.2 miliardë eurosh.
Përpara zhvendosjes, 31.3% e rezervave holandeze të arit mbahej në Nju Jork dhe 19.7% në Otava.
Pas operacionit, pjesa e arit të mbajtur në Londër është rritur nga 18.1% në 32.1%, ndërsa SHBA dhe Kanadaja së bashku mbajnë tashmë 18.5% të rezervës. Rreth 30.8% vazhdon të mbahet brenda Holandës.
Transferimi nuk është kryer vetëm fizikisht. Banka përdori një kombinim të shitblerjeve dhe transportit të drejtpërdrejtë të arit për të ulur rreziqet që lidhen me lëvizjen e sasive të mëdha.
Më shumë se 27 tonë ar fizik u transportuan nga SHBA dhe Kanadaja drejt Holandës, ndërsa një sasi e njëjtë u zhvendos nga Holanda drejt Londrës.
Vendimi vjen në një periudhë tensionesh të shtuara ndërkombëtare, ndërsa bankat qendrore në shumë vende po i kushtojnë gjithnjë e më shumë rëndësi arit si aset rezervë dhe mbrojtës në periudha pasigurie. /skyweb.al
