Durrësi regjistroi rritjen më të lartë të çmimeve të banesave të reja në Europë gjatë vitit 2025, me një rritje vjetore prej 24.1%.
Të dhënat e publikuara në raportin Property Index të Deloitte e rendisin qytetin bregdetar shqiptar në krye të 71 qyteteve të analizuara, duke lënë pas edhe disa tregje të rëndësishme europiane.
Pas Durrësit renditet Beogradi me një rritje prej 20%, ndërsa Cork County në Irlandë shënoi rritje prej 19%.
Bratislava dhe Gdansk raportuan gjithashtu rritje të konsiderueshme, me nga 17.2%.
Sipas analizës, rritja e çmimeve në Durrës është mbështetur nga kërkesa në rritje për prona pranë bregdetit, përmirësimi i aksesueshmërisë dhe afërsia me Tiranën.
Një tjetër faktor që ka ndikuar në ecurinë e tregut është zhvillimi i projekteve rezidenciale premium përgjatë vijës bregdetare, të cilat tërheqin si blerës që kërkojnë banesa për përdorim personal, ashtu edhe investitorë të interesuar për potencialin e tregut të pasurive të paluajtshme.
Performanca e Durrësit e vendos Shqipërinë në vëmendjen e tregut europian të pasurive të paluajtshme, veçanërisht në segmentin e banesave të reja.
Megjithatë, rritja e çmimeve nuk nënkupton domosdoshmërisht se banesat janë bërë më të përballueshme për familjet vendase, pasi kjo varet edhe nga ecuria e të ardhurave dhe mundësitë e financimit.
Gjithashtu edhe pse çmimi ka rritje nuk e bën Durrësin qytetin më të shtrenjtë në Europë.
Pasi në rang europian, diferencat mes tregjeve mbeten të mëdha.
Mynihu rezultoi qyteti më i shtrenjtë në analizë, me një çmim mesatar prej 11,200 eurosh për metër katror, i ndjekur nga Luksemburgu me 10,567 euro.
Në krahun tjetër, Ankaraja ishte qyteti më i lirë, me një mesatare prej vetëm 870 eurosh për metër katror.
Të dhënat tregojnë se tregjet europiane të banesave po ndjekin ritme të ndryshme zhvillimi.
Ndërsa disa qytete përballen me rënie të çmimeve, Durrësi shfaqet si një nga tregjet me rritjen më të fortë, duke reflektuar interesin për pronat bregdetare dhe zhvillimin e projekteve të reja rezidenciale. /tvscan.al
