Doganierët e Bllatës duket se i ka zënë sedra pas publikimit në media të listës së tarifave të ryshfetit për kalimin e naftës dhe produkteve ushqimore nga Maqedonia e Veriut drejt Shqipërisë.
Vetëm pak kohë pas denoncimeve të publikuara fillimisht nga Skyweb.al, Dega Doganore e Bllatës ka dalë me një njoftim publik për një aksion kundër kontrabandës, ku njofton se ka zbuluar dy kuti banane dhe ca lëngje frutash të padeklaruara.
Por ky njoftim vjen në një moment kur Dogana e Bllatës është në qendër të denoncimeve për një skemë të organizuar të kalimit të mallrave kundrejt ryshfetit, me tarifa të përcaktuara për çdo kategori ngarkese.
Skyweb.al ka raportuar më herët mbi ankesat e bizneseve të dërguara në Drejtorinë e Përgjithshme të Doganave, ku përshkruhet një rrjet i organizuar që mundëson kalimin e karburanteve dhe produkteve ushqimore nga Maqedonia e Veriut kundrejt pagesave informale.
Sipas këtyre denoncimeve që bizneset vetë kanë bërë në Tiranë, për kalimin e naftës përmes pikës kufitare të Bllatës tarifa e ryshfetit varion nga 15 deri në 20 lekë për litër, në varësi të sasisë së transportuar.
Ndërkohë, për furgonët me produkte ushqimore, bizneset raportojnë pagesa nga 300 deri në 500 euro për ngarkesë, me qëllim shmangien e kontrolleve dhe detyrimeve doganore.
Bizneset përmendin edhe një personazh të njohur me nofkën “Laluci” që sipas tyre jep viston për ngritjen ose jo të traut me mallra të padeklaruar duke i shkaktuar shtetit një dëm prej qindra milionë lekë.
Bizneset flasin për një rrjet të mirëorganizuar, përmes të cilit nafta dhe produktet ushqimore kalojnë kufirin dhe më pas shpërndahen në Dibër, Bulqizë, Burrel dhe zona të tjera të vendit.
Pikërisht në këtë situatë, Dogana e Bllatës ka zgjedhur të publikojë si rezultat të luftës kundër kontrabandës sekuestrimin e dy kutive me banane dhe disa koli me pije freskuese.
Ndërsa doganierët ekspozojnë në Facebook bananet dhe lëngjet e frutave, në Drejtorinë e Përgjithshme të Doganave ndodhen ankesat e bizneseve që përshkruajnë një aktivitet shumë më të gjerë, me karburante dhe ngarkesa ushqimore që kalojnë kundrejt tarifave të ryshfetit.
Drejtori Besmir Beja, i cili siç mëson skyweb.al ka firmosur dorëheqjen pa datë, pra është ende në detyrë, bën mirë të bëjë një vizitë tjetër në Bllatë dhe të verë rendin pasi situata duket se ka dalë jashtë kontrollit. Redaksia ka informacion se atij i kanë shkuar letër ankesat e shumë bizneseve në zyrë, por nëse i ka humbur, mund t’ia gjejmë sërish, mjafton që trau të mos ngrihet dhe ulet kur i do qejfi dhe xhepi “Lalucit”, por të zbatohet ligji.
Vijon..
/skyweb.al
