Gjatë ditëve të fundit, në media kanë dalë një sërë denoncimesh për korrupsionin në doganat shqiptare dhe presionet ndaj bizneseve nga një strukturë e organizuar, e cila akuzohet se mbledh para për lejimin e mallrave të padeklaruara, shmangien e kontrolleve dhe kalimin e ngarkesave në kundërshtim me ligjin.
Skyweb.al mëson se në dokumentet e ankesave të bizneseve përshkruhet një skemë me çmime fikse për çdo “shërbim”, të cilat subjektet i quajnë “gjoba”, ndërsa organizimi i saj lidhet me drejtues të administratës doganore.
Krahas Doganës së Durrësit, ku kanë dalë shifra prej 500 eurosh për furgon dhe deri në 10 mijë euro për kamion, në qendër të denoncimeve është edhe Dogana e Bllatës, në Dibër.
Në këtë pikë kufitare me Maqedoninë e Veriut operon një grup punonjësish doganorë, mes të cilëve ka si vendas, ashtu edhe persona të ardhur nga struktura të tjera.
Në qendër të ankesave është një personazh i njohur me nofkën “Laluci”, të cilit bizneset i atribuojnë një rol kyç në kontrollin e kalimit të mallrave dhe administrimin e pagesave informale.
Edhe pse për këtë personazh janë paraqitur vazhdimisht ankesa dhe raporte, mungesa e masave nga strukturat përgjegjëse ka ngritur dyshime për mbështetje nga nivele më të larta të administratës.
Një nga aktivitetet kryesore të përshkruara në denoncime është kontrabanda e naftës nga Maqedonia e Veriut drejt Shqipërisë.
Ky aktivitet është intensifikuar veçanërisht pas konfliktit me Iranin, kur çmimet e karburanteve në Shqipëri u rritën ndjeshëm, duke zgjeruar diferencën me tregun maqedonas.
Nafta kalon përmes Bllatës me kamionçina dhe bote të vegjël private, për t’u tregtuar më pas në Dibër, Bulqizë, Burrel dhe zona të tjera të vendit.
Për kalimin e karburantit, “tarifa” e ryshfetit është nga 15 deri në 20 lekë për litër, në varësi të sasisë së transportuar.
Por lista e çmimeve nuk përfundon me naftën.
Për furgonët që transportojnë produkte ushqimore nga Maqedonia e Veriut, “gjoba” për doganierët varion nga 300 deri në 500 euro, në varësi të sasisë së mallrave.
Në dokumentet e ankesave përshkruhet edhe roli i “Lalucit”, nga i cili duhet të merret miratimi përpara kalimit të ngarkesave.
Të gjitha këto praktika janë denoncuar pranë Drejtorisë së Përgjithshme të Doganave, por bizneset ankohen se nuk ka pasur ndërhyrje për t’i ndalur.
Mungesa e reagimit, pavarësisht ankesave të përsëritura, ka shtuar dyshimet se grupi vepron me mbështetje nga nivele më të larta të drejtimit të Doganave.
Skema e përshkruar në Bllatë ka të njëjtën logjikë me atë në Durrës, ku për çdo kategori mallrash ka një çmim të caktuar për të shmangur kontrollet dhe detyrimet doganore.
Përveç parave që u merren bizneseve, kontrabanda e karburanteve dhe produkteve ushqimore shkakton humbje të ardhurash për buxhetin e shtetit dhe dëmton konkurrencën me subjektet që paguajnë rregullisht detyrimet.
Dokumentacioni i ngarkesave, regjistrat e kalimeve kufitare dhe ankesat e depozituara ofrojnë mundësi konkrete për verifikimin e skemës dhe identifikimin e personave përgjegjës.
Ndërkohë, mbetet për t’u parë përse Drejtoria e Përgjithshme e Doganave nuk ka ndërmarrë masa të dukshme pas denoncimeve dhe kush e mbron grupin e “Lalucit” në Doganën e Bllatës. /skyweb.al
