Një vendim i Gjykatës së Apelit të Qarkut të Nëntë në SHBA ka pezulluar urdhrin që detyronte administratën amerikane të rihapte aplikimet për Lotarinë Amerikane të Green Card për vitin 2027.
Sipas Newsweek, gjykata pranoi kërkesën urgjente të qeverisë amerikane për të pezulluar vendimin e një gjykate më të ulët, e cila kishte urdhëruar Departamentin e Shtetit të hapte regjistrimet përpara 1 nëntorit.
Vendimi i ri i jep mundësi administratës së presidentit Donald Trump të mbajë të pezulluar procesin e aplikimeve, ndërsa vijon shqyrtimi i ankimit. Gjyqtarët argumentuan se pala që kishte ngritur padinë nuk kishte paraqitur prova të mjaftueshme për të justifikuar të drejtën ligjore për të kundërshtuar pezullimin e programit.
Megjithatë, çështja mbetet e hapur dhe vendimi nuk nënkupton anulimin përfundimtar të Lotarisë Amerikane.
Programi i Vizave të Diversitetit parashikon lëshimin e deri në 55 mijë vizave në vit për shtetasit e vendeve me nivele historikisht të ulëta emigrimi drejt Shteteve të Bashkuara.
Për momentin, autoritetet amerikane nuk kanë njoftuar një datë të re për hapjen e aplikimeve për lotarinë e vitit 2027.
