Shuma e depozitave që garantohen nga shteti do të rritet ndjeshëm. Agjencia e Sigurimit të Depozitave ka përgatitur një projektligj, i cili do të rrisë në mënyrë graduale shumën e depozitave që garantohen nga shteti.
Aktualisht, qeveria shqiptare garanton depozitat e qytetarëve në banka deri në 2.5 milionë lekë ose ekuivalentin në valutë. Por kjo shumë do të rritet në mënyrë graduale, fillimisht në 6 milionë lekë dhe më pas deri në 100 mijë euro sa është dhe limiti i Bashkimit Europian.
“Përsa i përket rritjes së nivelit të mbulimit, projektligji parashikon një përafrim gradual dhe të strukturuar drejt nivelit të harmonizuar të mbulimit prej 100,000 euro të kërkuar nga Direktiva 2014/49/BE,” thuhet në raportin e vitit 2025, që Agjencia e Sigurimit të Depozitave ka dërguar në Parlament.
Sipas Agjencisë, këto ndryshime përfaqësojnë rritjen më të madhe historike të nivelit të mbulimit për depozitat në banka në Shqipëri.
“Për të arritur këtë qëllim dispozitat përkatëse të projektligjit parashikojnë që rritja e nivelit të mbulimit të bëhet gradualisht për bankat anëtare të skemës, përkatësisht duke rritur nivelin e mbulimit nga kufiri aktual 2.500.000 lekë në 6.000.000 lekë. Në momentin e anëtarësimit të Republikës së Shqipërisë në Bashkimin Evropian, synohet që niveli i mbulimit të arrijë kundravlerën në lekë të shumës prej 100.000 euro, aq sa është edhe limiti në Bashkimin Evropian,” thuhet në raport.
Projektligji që rrit gradualisht mbulimin e depozitave të siguruara i është paraqitur Bankës së Shqipërisë në dhjetor të vitit të kaluar dhe pas marrjes së miratimit nga Banka Qendrore pritet të hyjë në proçedurën parlamentare të miratimit.
Sipas të dhënave zyrtare, në fund të vitit të kaluar shuma totale e depozitave në sistemin bankar arriti në 1,836 mld lekë me një rritje vjetore prej 9.1 %. Detyrimi i Agjencisë për kompensim në fund të këtij viti ishte 989 mld lekë, për 2,078,156 depozitues bankash. /kapitali.al
